U-19 Women’s One Day Trophy : Da 141 ron rem ki thei ïalehkai kriket ka Meghalaya ha ka Baroda

Shillong, Nohprah 12 : Ka kynhun ïalehkai kriket U-19 ki thei ïalehka ka Meghalaya watla ki la lah ban ïalehkai bha ha ka liang ka kawang bol hynrei ki la shah rem noh da 141 ron hakhmat ki thei ïalehkai jong ka Baroda ha ka lympung ïalehkai U-19 Women’s One Day Trophy.
Ka Meghalaya kaba la kawang bol nyngkong hadien ba ka la jop ka jingkynting pisa ha ka jingïalehkai hynne ka sngi Nyngkong ha Arun Jaitley Stadium (kaba la ju tip kum ka Feroz Shah Kotla Stadium) kaba ha New Delhi, ka Meghalaya ka la lah ban teh lakam ha ka jingkawang bol da kaba ai kamai 218 ron bad shim 8 wicket ha baroh ki 50 over ïa ka Baroda.
Hynriew ngut ka Meghalaya ka la pyndonkam ha ka liang ki nongkawang bol bad san ngut ki la khur mar shi wicket. Ka Blaridahun Dkhar bad ka Emisakani Warjri ki la pynkut kajuh ka jingkhur wicket mar 2 wicket bad ai kamai mar 45 ron ha ki 10 over ba ki ïoh ban kawang bol. Ka Awesa G Momin (1/27), Suriti Kumari Ray (1/33) bad ka Neelam Roy (1/54) kidei kiwei pat kiba la khur wicket na bynta ka kynhun jong ka Meghalaya.
Ka Meghalaya ka la ïoh ban teh lakam ka jingïoh kamai ron ka Baroda ha ka over ba 34 kaba la kamai 137 ron duh noh 7 wicket hynrei na ka jinglah ban ïalehkai bha ki arngut kiba la kamai ron lang ka Baroda ka ka la lah ban tam ïa katei ka ron da 200 ron.
Hynrei sniewbok na bynta ka Meghalaya, ha kaba ki thei kawang bol ka Baroda ruh ki khlem ailad ba kin ïoh kamai ron. Ka Ray ka ïoh ban kamai 22 ron katba ka Janika Marak ka kamai 12 ron hynrei ka Meghalaya ha ki 34 over ka la shah pynhap lut baroh ki wicket da kaba kynjoh tang 77 ron. Ka Meghalaya ha ka sngi Balang kan ïakhun pyrshah ïa ka Punjab.