Ngi donkam ïa ki ‘nongïalam’ ym shuh ïa ki ‘nongkhaïi’ ne ki ‘business man’: Dr. Fabian

Mawkyrwat, Nohprah 11: U General Secretary jong ka Meghalaya Pradesh Trinamool Congress Party, u Dr. Fabian Lyngdoh, u la pynkynmaw ïa ki paidbah jong ka Mawkyrwat Constituency ba kin long ki briew kiba kyndit bynriew noh ha kaba ïa dei bad ka jingjied ïa ki nongmihkhmat da kaba ong, “haba jied ïa ki nongmihkhmat, ki dei ban jied da u nongïalam ba shisha ne leader ym da ki nongkhaïi ne ki business man kiba khwan myntoi tang ïa lade shimet”.
Ïa kitei ki kyntien u la kren ha ka jingïalang paidbah jong ka All Meghalaya Trinamool Congress jong ka Mawkyrwat Block kaba la long hynnin ka sngi saitjaiñ ha madan shnong Tynnai, South West Khasi Hills District ha ryngkat ka jingsakhi lang da kiba bun ki paidbah jong ka dong ka thaiñ Riwar Zone. U Dr. Fabian u ong kumtei namar u la ïohi ba kumba ka long mynta ba bun ki nongmihkhmat ha ki konstitwensi wat ha Mawkyrwat Constituency ruh u dei u nongkhaïi ym u nongïalam jong ki paidbah. Namarkata, kum ki paidbah jong ka Mawkyrwat ki dei ban long kiba stad ha ka ban jied ïa ki nongmihkhmat khnang ba kan nym long ka daw jong ka jingeh ïa ka pateng ka ban wan namar kane ka jaidbynriew jong ngi mynta kam don shuh ki nongïalam kiba khraw.
Ha ka jingkren jong u, u la pynshai ruh ba ka jingthmu jong u ban ïa don bynta lang ha kane ka jingïalang ka long ban pynithuh ba u u don mynta ha ka party TMC bad kawei pat ka long ban pynshlur bad ai mynsiem ïa ki paidbah ba kin ai ka jingkyrshan na ka bynta u bah Sounder Strong Cajee ba un long u nongmihkhmat lyngba ka jingpynjop jong ki paidbah ha kane ka MLA Election 2023 da kaba ban biang ruh ba to kin nym jied nongmihkhmat shuh da ki nongkhaïi hynrei kin jied noh u nongïalam uba shisha.
“Ngi donkam ïa ki nongïalam bad ki nongmihkhmat kiba khraw hapoh Assembly ha kaba wat u Conrad Sangma ruh un hap pyndem ñiuh ‘mat ha kita bad lada u Dr. Mukul un jop ruh um dei ban i-beiñ”, ong u Dr. Fabian. U la pynshai shuh shuh ba u MLA uba dang khmih lynti ïa ki ‘work order’ uta um dei u nongmihkhmat hynrei u la dei lypa u nongkhaïi bad uba shim kabu ban long nongmihkhmat ban ïoh ka bor ban ai ‘work order’ ïa lade.
Haba kren bad pynshai ïa ki katto katne ki mat treikam jong ka party TMC, u Dr. Fabian u la ong ba kane party ka dei na ka bynta u duk u suk bad kumjuh ruh ka party ka ban ym ktah ïa ka jingtreikam ne tuklar khamtam eh ha kaba ïa dei bad ka jingshakri Blei namar ym kum ka BJP kaba don jingthmu ban pynlong tang kawei ka niam bad tang kawei ka kynhun. Shuh shuh u la ong ruh ba ka dei tang ma ka kaba nud ban ïeng ïaleh pyrshah ïa ka BJP hapoh jong ka Ri India. U la pynshai shuh shuh ba balei sa mih kane ka Trinamool Congress ka dei namar ba ki don ki nongïalam ha ki por ba la leit kiba bat ïa ka bor bad thmu ban ñion beiñ ïa ki duk ki suk, kumta ka Himamta ka sa seng ïa kane ka Trinamool Congress da ka jingthmu ba kan long ka party jong ki paidbah bad jong kiba rit ba ria ne grass root.
U Sounder Strong Cajee u kyrtong ka TMC Mawkyrwat Constituency ha ka jingkren jong u u la ong ba ha kane ka kynti ba mynta ki donkam shisha ïa ki briew kiba shlur bad kiba ïap tang shisien kum u Tirot Sing, u Kiang Nongbah, u Sngap Sing Syiem ki ban ïada ïa ka jaidbynriew ym ki khawpud, ki khaw eit bad kiba ‘tieng eit kiba ïap bunsien bad kiba rah kti shwa ba ki nongshun kin ker kut. Namarkata, u la ong ba kum ka party ka wan mynta hangne ban tyrwa ba ki dei ban ai lad ïa kane ka party TMC ha kane ka MLA Election 2023 ha kaba ka kali kan nym ïaid khlem u nongñiah bad ka party ruh kan nym lah ban kren lada ym don u briew ban kren. Kumta ka long kaba donkam ba ki dei ban ïoh ïa u nongñiah ïa kali na Mawkyrwat sha Secretariat bad sha Assembly.
Shuh shuh u la ong ruh ba u bah Sounder S. Cajee u dei u pyrsa kurim jong u bah Rowell Lyngdoh (bam kwah ha dwar U Blei), um dei u nongkhaïi, um dei u nonghikai skul, um dei u ophisar sorkar uba la shongthait ne ba dang trei, hynrei u dei uta u nongïalam uba la mat ïa shibun ki jingeh, u dei ruh u nongïalam jong ka seng samla pule ha ki snem 1987, uba la seng ruh ïa ka FKJGP ha u snem 1990 bad uba la pynlong ka jingïalang ban ïakhih bad ïada ïa ka jaidbynriew hapoh Motphran ha kita ki snem.
Kumta ha kane ka kynti ba mynta, kum ka jaidbynriew ka la donkam ïa ki nongthaw aiñ ym shuh ïa ki nongthaw pisa. Ha ka jingkren jong u u la tyrwa ruh ha ki paidbah ba kin ai lem ka kti ka mon ka kti ka diang ban pynjop bad kyrshan ha kane ka MLA Election 2023 ym da kaba tyrwa ban pynïoh ei ei na ka bynta ki paidbah hynrei jied ïa u ban long ka jingshngaiñ ïa ka ri bad ka jaidbynriew bad u jingshngaiñ na ka bynta u duk u suk. “Ki ong ba u bah Sounder u dei u lehnoh”, ong u bah Sounder bad shisha nga dei keiñ u lehnoh bad nga lehnoh ïa kita ki kam ïa kiba ki MLA kiba mynta kin shem la leh, ngan lehnoh bad plie ïa ka jaka sumar ba 100 jingthiah na ka bynta kiba duk.
Kiwei pat kiba la ïadonlang bad kiba la ai jingkren ki long u samla Benjohnson Lyngdoh, President jong ka Mawkyrwat Constituency Socio Economical & Political Awareness Committee (MCSEPAC) Youth Wings, ka kong Preliyne Marweiñ, Chief Organiser jong ka MCSEPAC Women’s Wings, u bah Bokstone Thongni, Vice President ka TMC Rangblang Area, bah Remdor Shylla, General Secretary ka TMC Mawkyrwat Block, bah Diverland Lyngdoh, Adviser jong ka Mawkyrwat Constituency Socio Economical & Political Awareness Committee (MCSEPAC).
Ïa ka jingïalang la pynïaid da u ba Kordorlin Kharlyngdoh bad bud ka jingkren pdiang na u bah Wulslanding Shylla, Secretary ka TMC Zone Photjaud Area.
La pynshit pynshngaiñ ïa kane ka jingïalang da ka jingshad na iwei i hep rit na ka Shnong Mawrap, na ka Judi bad ka Jazy Wanniang bud ka jingrwai na u bah Shiningstar Nongsiej.