Shah jied u Bah Donald bad ka Kong Margret kum ki ‘Ri Bhoi Idol’ ban pynshlur ïa ka hok thep vote ki paidbah

Nongpoh, Nohprah 08: Kumba la pynkup bor da ka riti synshar ka ri India bad ba ka Election Commission ka ri India ka la ju pynshlur ïa ki nongshong shnong ka ri India ba ki dei ban tip ïa la ka hok ban jied ïa kita ki nongmihkhmat da kaba pynrung kyrteng ha ka electoral roll, ka bor synshar District na Ri Bhoi lyngab ka tnad Election ha kane ka kynti ka la jied ïa ar ngut ki riew pawkhmat ha ka kam ïalehkai sport kum kita ki ‘Ri Bhoi Idol’ ba kin long kita ki nongmuna ban ai mynsiem bad ban pynshlur ïa ki paidbah nongshong shnong ka Ri Bhoi ba ki dei ban don ïa la ka jong ka hok ban jied ïa ki nongmihkhmat.
Kine ki ar ngut kiba la shah jied ban long kum kita ki ‘Ri Bhoi Idol’ ki kynthup ïa ka Kong Margret Pathaw na Umsning kaba la paw ha ka kam ïalehkai sport ba la tip kum ka Arm wrestling bad dang shen ruh ka la ioh ban khur ïa ka takma ksiar na ka jingïalehkai Arm Wrestling kaba long ha ka ri Turkey bad u Bah Donald Rymbai na ka Shnong Mawroh uba la ioh khur ïa ka nam jop ha ka kyrdan ka balai ha ka jingïakhun ïa ka Weight Lifting ha ka North East Game kaba dang shu kut dang shen ha Nongbah Shillong.
Kine ki ar ngut ki samla rangbah ka Ri Bhoi, kiba la shah jied kum ki Ri Bhoi Idol ki dei kiba la ithuh da ka sorkar Meghalaya lyngba ka ophis u Deputy Commissioner ka Ri Bhoi na ka tnad Election bad ha kane ka kynti kin long kum kita ki nongmuna ki ban ïalap sha ki paidbah halor ka jingkordor jong ka hok ban ioh ban jied ïa ki nongmihkhmat bad ruh ba ki paidbah ki dei ban sgnewthuh ba ka riti synshar ka ri India ka la dep ban pynkup bor ba ym don ba lah ban tuklar ïa kane ka hok kaba ki don ban jied ïa ki nongmihkhmat paidbah.
Kumba la pynpaw, kane ka jingthmu ban jied ïa kine ki ar ngut ban long kita ki Ri Bhoi Idol, ki dei ban long kita ki nongpynphriang khubor kaba khlem da shah liang ïa kano kano ka pollical party ha ka jylla bad ka kamram ka jongki kum kita ki Ri Bhoi Idol ka long ban leit sha ki paidbah bad ban ai jingpynsngewthuh na ka bynta ba kin wan shakhmat ban pynrung kyrteng ha ka Electoral Roll bad dei tang ka jingpynrung kyrteng ha kane ka thup ban ioh jied ïa ki nongmihkhmat ki paidbah kin lah ban jied ïa uno uno u nongmihkhmat paidbah ha kano kano ka election jied nongmihkhmat khamtam mynta ka jylla Meghalaya ka don ha ka jingïaid lynti ban jied pynthymmai biang ïa ki MLA na ka bynta ban long kita ki nongïasaid aiñ sha ka ïing Dorbar thaw aiñ ha poh ka jylla.