ïoh jingkyrmen biang ki kmie ki kpa, ki nonghikai bad ki khynnah skul ba la lait na ki kyndon ka khlam

Nongpoh, Naiwieng 08 : Wat hapdeng shibun ki jingduh jingkyrmen bad ba u lyoh badum u la wan tap ïa ka jingmut jingpyrkhat ki kmie ki kpa, ki nonghikai bad ki khynnah skul kiba la shah ktah ïa ka puel ka puthi na ka jignwan lynshop ka khlam COVID-19 ha ki snem ba la leit noh, hynrei ki kmie ki kpa, ki nonghikai bad ki khynnah skul ki la ioh jingkyrmen biang mynta u snem kaba dei hadien ba ka pule ka puthi ka la ïaid beit ïaid ryntih bad ki la lah ban long kumba ka ju long baroh shi katta ha ka por bay m pat wan lynshop ka khlam COVID-19.
Kine ki jingkyrmen bad ka jingkmen ka mynsiem kiba la wan phai biang sha ki khynnah skul, ki kmie ki kpa bad ki nonghikai ka la paw prythei ruh mynta ka sngi, kaba dei hadien ba ka Alpha English Higher Secondary School, Nongpoh kum kawei na ka shlem ai jingnang jingstad ïa ki khynnah skul ka la lah ban pynbna noh ïa ka risot ki khynnah skul kumba ka ju long baroh shi katta.
Kine ki ar ngut ki samla rangbah ka Ri Bhoi kiba la paw ha ka kam ïalehkai sport ki la shah jied ban long kum kita ki Ri Bhoi Idol ka dei ha ka 20 tarik u Naiwieng 2022 ba kin long kita ki nongrah khubor ban pynshlur ïa ki paidbah ka Ri Bhoi kiba la kot 18 snem shaneng ban pynrung kyrteng ha ka Electoral Roll na ka bynta ban ioh ïa kata ka hok ban jied ïa ki nongmihkhmat paidbah.
Lah ban ong ha kine ki ar snem ba la leit noh na ka jingwan lynshop ka khlam COVID-19 ka la ktah lut ïa ki jingmut jingpyrkhat ki kmie ki kpa, ki nonghikai bad ki khynnah skul, namar ba ha ka liing ka pule ka puthi ki la shah ktah jur na ka daw ba ki hap ban bud ïa kita ki kyndon bapher bapher ban ïada na katei ka khlam COVID-19.
Mynta ka sngi, ka la long ka sngi kaba phuh ba phieng naduh ki nonghikai, ki kmie ki kpa bad ki khynnah skul, ha kaba khlem da don shuh kano kano ka jingpynthud ka Alpha English Higher Secondary School, Nongpoh ka la lah ban pynbna ïa ka resot ki khynnah skul bad ka jingpynïaid na ka bynta ki skul kan sa long noh kaba ïaid beit ïaid ryntih khlem da don shuh kano kano ka jingpynthud khamtam ïa ki khynnah skul ba kin wan sha skul.
Na ka liang ka Alpha English Higher Secondary School, Nongpoh mynta ka sngi hadien ba ki khynnah skul ki la thoh ïa ki eksamin naduh ka Klas Nursery haduh Klas- X jong u snem 2022 bad la lah ruh ban pynbna ïa ka resot ba ki khynnah skul kiba la pas ïa ka eksamin kin sa ioh ban kiew klad bad ka jinglong skul ruh kan long noh kaba ïaid beit ïaid ryntih kumba la pynbna da ki bor pynïaid skul. Kaei kaba la paw shabar ha kane ka jingpynbna risot, ka dei ka jingkmen kaba la rung ha ki jngmut jingpyrkhat ki khynnah skul, ki kmie ki kpa bad ruh ki nonghikai sku, ha kaba ki la don ka jingkyrmen ba kin dang lah shuh shuh ban kyntiew ïa ka pule ka puthi hadien ba ym don shuh kano kano ka kyndon kaba teh ba khum ban wan sha skul bad ban pule puthi kumba la leh ha ki snem ba la leit noh na ka jingwan lynshop ka khlam COVID-19.
Kumba la ai jingkren ha kane ka sngi, da ka Principal ka Alpha English Higher Secondary School, ka Kong W.K Blah ka la pynpaw ka jingkmen ba ka jinglong jingman ka la wan phai biang kumba long baroh shi katta khlem da don shuh kano kano ka jingshah pynthud ïa ki khynanh skul bad ka buh ruh ka thong ban don ka jingïatrei lang na ka bynta ban ai jingstad ïa ki khun ki ban long ki lawei jong ka imlang ka sahlang bad ka jaid bynriew.
Ka la ong ruh ba ka jingnang jingstad ka long kaba donkam haduh katta katta bad dei namar kane ka daw ngi donkam ka jingïatrei lang naduh ki kmie ki kpa, ki nonghikak bad ki khun bad lada don ka jingïatrei lang ngin dang lah ban ai ka jinghikai kaba biang tam ïa ki khynnah khnang ba kin kynjoh sha ka thong jong ka jingim.
Shuh shuh, ka la ong ruh ba mynta u snem kin sdang noh kham kloi ïa ka skul khnang ba kin lah ban pyndep ïa ki syllabus bapher bapher bad ban kyntiew ïa ki khun ki kti ba kin kiew ha ka pule ka puthi, la donkam ka jingïatrei lang naduh ki kmie ki kpa, ki nonghikai bad ki khynnah skul, bynrap ka Kong W.K Blah ha kane ka sngi ba la pynbna paidbah ïa ka risot ki khynnah skul.
Kum ban pynpaw paidbah, kane ka jingkyrmen kam dei satia tang ïa ka skul Alpha bad ïa ki skul hi baroh kawei ha ka jylla bad wat ha ka imlang ka sahlang, ha kaba lah ban ong ha ki ar snem ba la leit noh ka jingsyrtok ka la ktah ha baroh ki liang na ka jingwan lynshop ka khlam COVID-19 ha ka prythei hi baroh kawei.