Jowai, Nohprah 09: Ka Lion Sports & Youth Affairs ha ka thong ban sei bad pynmih pyrthei ïa ka sap ka phong jong ki khun samla don sap ha ka liang ka rwai ka siaw ka put ka tem, mynta u snem ka la pynlong ïa ka Rokustica Unplugged Music Competition 2022.
Ha ka Grand Finale jong kane ka ïakop ba la pynlong ha ka 8 tarik Nohprah ha Lion Mission Compound Dorbar Chnong Auditorium u Wailadmiki Shylla, MLA Jowai u la wan ban donlang kum u kongsan ryngkat u Octomewot Lamin, Nominated MDC-JHADC kam u symbood kongsan.
Ha ka jingïalang maitphang jong kane ka janmiet ba la pynïaid da u Donkupar Syngkrem, President LSAYA, u Pynhiam Kharkongor, Advisor LSAYA u la ai ki kyntien lyngkot halor ka thong bad ka jingthmu jong kane ka prokram katba u L.Dauni Laloo, Secretary Rokustica u la pashat ki kyntien khublei.
Ha kane ka Rokustica Unplugged Music Competition 2022, ki nongïashimbynta kiba la poi sha ka Grand Finale jong kane ka jingïakop ki long ka kynhun Meraki, Melodic Hues, Dawbhaki Pde, Saini Diang Bareh, The Hawk, Saiwansa Challam, Radiant Wave, Teibok Tongper, Audio Garde wa u Donean Laloo bad ïa kane ka jingïakop lawan ban bishar da ki riew don sap ka ri lum Jaiñtia ha ka liang ka rwai ka siaw ka put ka tem ba kynthup ïa u Ram Suchiang (singger) ka Amable Susngi (singer) bad u Starly Shullai (vocalist)
Ka kynhun MERAKI ba la mihkhmat da u Byron Mandy Lamare, u Jobian Mandy Lamare bad u Mardy Pohdweng kum ka lah duh jong kane ka Rockustica Unplugged Music Competition 2022 ka la ïoh ban rah ïa ka song pisa ba 30 hajar tyngka, ka Dawbhaki Pde kum ka Runners-up ryngkat ka song pisa ba 15 hajar tyngka katba ka Melodic Hues ba la mihkhmat da u Alexis Syngkrem, Winifred Passah, Rilana Lawai, Donald Syngkrem wa u Posperwell Dhar ka la rah ïa ka nam Best Original Song ryngkat ka song pisa basan hajar tyngka.
