Ka Jylla Assam ka la roi sted bha naduh ba ïoh synshar ka BJP, ong u Dr. Shyamal Saikia

Nongstoiñ, Nohprah 9: Kum shibynta jong ka jingpynkhreh ïa ka election ha u snem ban wan kata ha u 2023, ka Bharatya Janata Party na Delhi ha ka sngi thohdieng ka la phah ïa u Dr. Shyamal Saikia sha Nongstoiñ ban ïakynduh ïa ki nongïalam jong ka BJP Nongstoiñ Mandal, ban pynshai ha ki ïa kiba bun ki mat treikam ba kin pynshai sha ki paitbah ha ka por kanbas election.
Lah ban kdew hangne ba u Dr Saikia u dei uwei na ki nongpeit pyrman jong ka party, u ba la thung na ka bynta ba un peit ïa ka jinglong jingman jong ka party ha ki jylla jong ka thaiñ shatei lam mihngi, ba kynthup ïa ka Assam, Meghalaya, Manipur, Mizoram, Arunachal Pradesh Tripura bad kiwei kiwei ki jylla bad u shong u sah ha Guwahati.
U Dr Saikia u dei ruh u heh pulit u ba la shong thait bad u ba la bat teng kum u SP jong ka Kamrup Distirct. U la shah pynkiew haduh ka kyrdan Additional Inspector General of Police jong ka sorkar Assam bad hadien ba u la shnong thait u la shah jied kum u nongpeit pyrman jong ka Bharatya Janata Party.
Ha ka jingwan ha Nongstoiñ la synran lang ïa u Dr Saikia da u bah David Kharsati State President ka BJP Meghalaya, u bah W.Marbañiang bad kiwei kiwei ki nongïalam jong ka BJP. La pynlong ruh ïa ka jingïalang ha ka ophis treikam jong ka party ha Upper New Nongstoiñ, ha kaba bun ki paitbah bad ki dkhot na kylleng ki shnong ba kynthup ïa ki samla, ki longkmie bad ki rangbah ki la wan ha katei ka jingïalang.
U bah David Kharsati u la ong ba ha kane ka election ba dang shu dep ha Gujarat, ka Congress ka la pyrshang katba lah ban theh da ka pisa bad ka thong ka long ban pynrem kput ïa ka BJP hynrei kam shym la lah satia. U la ong ruh ba uno uno u ba thmu ban rung sha ka BJP bad ban ïaleh elekshon na ka bynta ka jingmyntoi shimet jong u, yn ym don jaka satia namar ka thong ba hakhmat eh jong ka BJP, ka long ban shakri ïa ki paitbah da ka hok khlem kano kano ka jingbam sap.
U Dr Shyamal Saikia u la ong ba naduh ba ka BJP ka la ïoh ban synshar ha Assam, ka roi ka par ka la kiew sted bha, ka jingïoh kam ïoh jam jong ki samla ka la kiew sted bha, ki longkmie ki la ïoh shibun bah ki jingmyntoi lyngba ki skhim bapher bapher ba ka sorkar pdeng ka la ai na ka bynta jong ki.
U la ong ruh ba ha Meghalaya ka sorkar pdeng ka la mang pisa kyrpang haduh ar lak tyngka na ka bynta kawei ka longïing kaba duk tasam ban shna ïa ki ïingsah kiba bha. ïa katei ka pisa la phah lyngba ki Bank account jong ki, khnang ba kan ym don kano kano ka jingshah khate haba ki leit ban sei ïa ka pisa, na ka bynta ban thied ïa ki tiar ki tar kiba don kam ha kaba shna ïa ki ïing ki sem jong ki.
U la ong ba kawei pat ka skhim kaba kyrpang ba u Narendra Modi Myntri u la leh bha ïa ki paitbah nongshong shnong, ka dei ka skim ban pynpoi umbam umdih ha man la ki thliew ïing kaba la tip kum ka Jaal Jivan Mission (JJM). Hynrei kaba lyngngoh pat ka long ba kane ka sorkar Meghalaya kam shym la pyntrei kam hok, namar katkum ka jingtip ba u la ïoh na ki paitbah ka long ba wat la ki pipe ki la poi ha man ki thliew ïing ruh kim ïoh um satia.
U la ong ruh ba katei ka jingbym ïoh um ka dei namar ka jingtorti jong ki nongpyntrei bad ka jingpyndon kam bakla jong ka sorkar ïa ka pisa ba la mang da ka sorkar pdeng. U Dr. Saikia u la kyntu ruh ïa ki paitbah ba halor ka jingbym poi thikna jong ka umbam umdih ha ki ïing ki sem jong ki, kim dei ban ailad hynrei ki dei ban pyntip sha ki nongïalam jong ka party, khnang ba kin phah ïa ka kaiphod sha u ba un pyntip sha Delhi bad ka sorkar pdeng kan leh ïa kaba donkam.
Hadien ba la wai ka jingïalang kum ka dak jong ka jingsngewkmen na ka bynta ka jingjop ha ka election ha Gujarat, ki la pynlong ïa ka jingthang bom pataka ha jrong jong ka mala jong ka ophis treikam.