Mawkyrwat, Nohprah, 09: Ka Seng Samla Shnong Mawkyrwat ryngkat ka jingïatreilang bad ka ophis jong ka Deputy Commissioner, South West Khasi Hills District ka la pynlong mynta ka sngi ïa ka District Talents & Musical Evening, Mr & Miss Mawkyrwat 2022 ha Nativity Stadium Mawkyrwat kum shi bynta jong ka jongrakhe ia ka jingdap 50 snem ka jongioh ia ka jylla ba pura ha kaba u Myntri ba donbirom jong ka sorkar jylla u bah Renikton Lynhdoh Tongkhar u la long u kongsan.
Haba kren ha kaba ïadei bad ka jingrakhe lyngba kane ka prokram u bah Tongkhar u la ong ba kum ka jylla ngi la kiew ha ka roi ka par ha baroh ki liang la la long ha ka ïoh ka kot, ki lynti ki syngkien, ka koit ka khiah, ka pule ka puthi haba ïa nujor bad ki 50 snem kiba la leit bad ngi dei ban sngewnguh ïa ki longdien mandien kiba la long ki nongsaiñ dur bad ki nongprat lynti bad mynta ka shong sa ha ki kum ki samla kumno ban pyndep ïa kaba dang sah bad ban nang kyntiew ïa ka jylla bad ban nang kham pynbha ha baroh ki liang.
Haba phai sha ki samla u la ai mynsiem ïa ki ban nang kiew shaphrang ha ka jingim bad ban nangtrei shitom khnang ban nang rah ïa ka ri bad ka jylla kham shajrong.
Haba kren ha ka jingïalang ka kong Catamai Kharkongngor, Deputy Commissioner ka Maw-kyrwat ka la ong ba kane ka sngi ka long kum shibynta jong ka jingrakhe ïa ka jingdap 50 snem ka jingïoh ïa ka jylla ba pura jong ka Meghalaya bad ha kaba ïadei bad kane ka sngi ka la ïaroh ïa ka sap ki phong jong ki khun samla kiba la pyni halor kane ka rynsan ha kane ka sngi da kaba ong ba ki samla jong kane ka thaiñ kim duna shuh haba ïa nujor bad kiwei pat ki samla kiba ha kane ka jylla ha kaba ïadei bad kane ka bynta. Ka ong ruh ba kane ka jylla jong ngi ka la biang lut nadong hadong bad kam da duna than haba ïa nujor bad kiwei ki jylla bad ki la don shibun ki jingkylla ha ka jylla jong ngi da kaba ai mynsiem ïa ki samla ba ka jingmih jong ki lyngba kum kine ki rynsan kan ïarap ban pynshlur bad ai jingkyrmen ïa ki ban don ka mynsiem ïakhun bad ban kiew arted ha ka jingim.
U bah Carness Soh-shang, MDC jong ka Mawkyrwat Constituency haba kren ha kane ka sngi ula pynpaw ïa ka jingkmen ban ïohi ba ki samla jong kane ka dong ka thaiñ ki la nang kiew ha kaa sap ka phong kaba ki don hynrei u pynkynmaw ruh ba wat hapdeng ka jingroi bad ka jingkiew sted ha ki liang baroh namar shibun ki jingkylla ngim dei ban klet ïa la ka jong. U khmih lynti ba lyngba kum kine ki rynsan yn lah shuh ban pyni ïa ka riam ka distur tynrai bad ban pynneh da kaba ngi sarong la ka jong bad ban nang ban burom ïa ka jong kiwei.
Ha kane ka sngi la ïoh ruh ka jingpynkup burom da ka Seng Samla ïa u bah Renikton Lyngdoh Tongkhar, MLA, u bah Carness Sohshang, MDC, ka kong C. Kharkong-ngor, DC, u bah H.S. Diengdoh Red MCS bad Myntri barim ka shnong Mawkyrwat bad kiwei de ki ‘riew rangbah.
La sam ruh ïa ki khusnam sha ki nongjop ha ki jingïakop bapher bapher ha kaba u bah Dawningstar Marweiñ, Gen Secretary jong ka Deng Samla Shnong Mawkyrwat u la ai ïa ki kyntien pdiang burom katba u katba u bah J. Lyngdoh, Asst. Secretary jong ka Seng Samla Shnong Mawkyrwat u la ai ia ki kyntien khublei.
