Ka Civil Sub-Division ha Patharkhmah kam dei ban long tang ka buit elekshon, hynrei ka dei ban longdoh longsnam bad ban treikam pura

Nongpoh, Nohprah 08: Ka 2 tarik Nohprah, 2022 ka dei ka sngi ka ban sah jingkynmaw ha ka history ka Ri-Bhoi Sepngi (Western Ri-Bhoi), bad ka Ri-Bhoi District, kumjuh ha ka jylla hi baroh kawei, hadien ba u Myntri Rangbah ka jylla u Conrad K Sangma u la plie mawnongrim bad pynbna paidbah ban kyntiew kyrdan ïa ka Patharkhmah Administrative Unit sha ka Civil Sub Division.
Kane kadei ka jingdawa kaba la slem kaba ki paidbah nong shongshnong, ka Ri-Bhoi Sepngi, ki la ap khmih lynti bad angnud da ki phew snem, ban ioh ïa ka Civil Sub Division, bad ka la urlong, ka jing sngew nguh kaba kyrpang ka leit sha u Myntri Rangbah jong ka sorkar jylla, u Conrad K Sangma, u Bah S Sohtun Nongmihkhmat ka thaiñ, u ba la lah ban pynkohnguh ïa u Myntri Rangbah, ka jing khublei ïaka Ri-Bhoi Dorbar, ka Western Ri-Bhoi Dorbar Demanding Committeeon Civil Sub Division kiba ïai buddien na ka por sha ka por bad baroh ki ba la ïadon bynta ha kane ka jing dawa ban ioh Civil Sub Division ba thymmai, kane ka dei ka civil sub division ba nyngkong eh Ri-Bhoi.
Ka jingioh ïaka Civil Sub Division ha Patharkhmah kan long ka jingkyrkhu kaba khraw bad ka jingmyntoi ïaki paidbah nongshong shnong ka thaiñ, namar baroh shi katta ki paidbah ki hap ban leit ban wan shaduh Nongpoh naka bynta ki jingdonkam haki tnad ophis sorkar bapher bapher, hynrei da ka jingioh ïaka Civil Sub Division ha Patharkhmah la jan baroh ki kam la lah ban pyndep hapoh ka Civil Sub Division ha kaba baroh ki tnad ophis sorkar kin don lut lait noh tang katto katne lehse.
Ka jingioh ïaka Civil Sub Divison ha Patharkhmah kam dei ban long tang shi sngi, kam dei ban kut tang haka sngi ot ribbon, haka jingbuh maw nongrim bad kam dei ban long tang ka buit ban jop elekshon jongno re jongno bala jan ka elekshon, hynrei ka dei ban longdoh longsnam kum ka Civil Sub Division ba pura ka ban ai jingmyntoi bad ka jingshakri ïaki paidbah nongshong shnong ka thaiñ baroh kawei.
Ha Ri-Bhoi ka sorkar kala dei ban thaw bad pynkha thymmai biang sa kawei ka Civil Sub Divison naka bynta ki paidbah ka thaiñ Ri-Bhoi Mihngi, da kaba kyntiew kyrdan noh ïaka Bhoirymbong C&RD block sha ka Civil Sub Division namar ka jingjngai palat ïaki paidbah ban leit ban wans haduh Nongpoh naka bynta ki jingdonkam haki tnad sorkar bapher bapher, bad hakajuh ka por ban pynkha bad thaw thymmai biang sa 2 tylli ki C&RD Block kata ha Umden Raid Nongtluh bad ha Mawhati, namar ka jingjngai palat ki jaka, ki shnong, ki lynti syngkien, ba ki paidbah ki shem jingeh ban leit shaduh Umling C&RD Block bad Umsning C&RD Block namar ka ktah shikatdei ïaki paidbah haka bai leit bai wan, ka pisa tyngka bad ka nongsngi jong ki.