Nongpoh, Naiweing 08: Ka Ïatreilang Village Organisation jong ka Shnong Nongdewsaw kaba hap hapoh ka NRLM Umsning C&RD Block, hynne ka sngi kala rakhe ïaka jingdap 1 snem jong ka Village Organisation haka lynti iaid jong kum ki kynhun jong ki longkmie ban ai ïaka jingshakri sha ka imlang ka sahlang khamtam ban kyrshan ïaki para longkmie.
Kum ban shu kdew hangne la seng ïaka Ïatreilang Village Organisation ha ka 8 tarik u Nohprah jong u snem 2021 bad haduh mynta kane ka VO ka kdup lang ïa 5 tylli ki SHG ha ryngkat bad ki 3 SHGs kiba kham kyrpang ki ba kynthup ïa 2 tylli ki SHGs jong ki Tymmen kiba ka kot sha ka 60 snem bad kawei ka SHG jong ki briew kiba don ïaka jingduna haki dkhot met bad katei ka VO ka la noh synñiang shibun ki kam haka imlang ka sahlang naduh ban wanrha ka khuid ka suba ïaka shnong ka thaw, ban weng ïaki kam sniew kam smeh bad kiwei kiwei
Ha kane ka sngi lehkmen jong ka jingdap 1 snem jong ka VO lawan ban ïadon bynta lang da u Bah Jayson S Mawlong MLA ka Umsning, Macdalyne S Mawlong MDC Umsning, BDO jong ka Umsning C&RD Block, U Raja Brahma, Bah AB Warjri rangbah shnong ka Nongdewsaw, ka kong Sonia Lapang President ka Iatreilang VO, ki dkhot jong ka VO bad SHGs, ki dkhot bad ki khun samla jong ka Shnong Nongdewsaw bad kiwei kiwei ki riew rangbah.
Haba kren ha katei ka sngi naka liang u Bah Jason S Mawlong MLA ka Umsning u la pynpaw ka jingsngewkmen kaba khraw ba ki longkmie ha bun tylli ki shnong kila sdang ban kiew shaphrang lyngba ka jingthaw ïaki VO bad SHGs ban trei bad kyrshan para longkmie khamtam ban ieng hala ki jong ki kjat.
U la ong ruh ba kum ki longkmie nalor ka kam kaba ki trei ki don ruh ka bynta kaba khraw haka imlang ka sahlang naduh ban pynduhjait ïaki kam sniew kam smeh hapoh shnong, ban peit ïaka iing ka sem bad khamtam ka jingthaw ïaki SHG ka long kum ka jingkyrshan ïaki longkmie haka shnong bad kyntu ruh ïaki longkmie ha katei ka shnong ba kin don ka jingïatylli naka bynta ka jingkiew shaphrang jong ka shnong bad ki liang baroh.
