Nongpoh, Nohprah 08: Kum ka jingai mynsiem bad ka jingpynshlur ïaki rang bad thei ïalehkai na Ri-Bhoi District kiba la leit ban shim bynta bad khur takma naka 2 North East Olympic Games 2022 kaba dang shu dep shen ha Nongbah Shillong, ka Synjuk ki Rangbah Shnong, Ri-Bhoi District kan sa pynlong da ka jingpynkup burom ba kyrpang ïaki rang bad thei ïalehkai ka Ri-Bhoi District haka 10 tarik mynta u bnai ha ïing Dorbar, Nongpoh.
Haba phah ïaka kyrwoh naka liang u Bah PB Sylliang Secretary ka Synjuk u la ong ba ïa katei ka jingpynkup burom yn sdang naduh ka por 11 baje mynstep, ba kum ka Synjuk ka dap da ka jingsngewkmen kaba khraw ha kaba ki samla na ka dong Ri-Bhoi kiba la leit ban mihkhmat sha katei ka lympung kila ioh ban khur takma haki jingïalehkai bapher bapher kaba long ka jingsarong ïaka district bad ka jylla baroh kawei, bad katei ka jingpynkup burom ka long kum ka jing ai mynsiem ïaki ba kin dang pynkhreh bha shuh shuh ha kiwei pat ki jingïalehkai kiba kham heh.
Kumta naka liang ka Synjuk ka kyrpad ïa baroh ki samla kynthei bad shynrang kiba la khur takma na katei ka lympung ïalehkai ba kin wan ha katei ka sngi ban pdiang ruh ïaka jingshah pynkup burom naka Synjuk.
