Pynshai balei ban thmu ai wai ïa ka IB PWD sha ki riew shimet khlem khot tender; dawa ki saw seng

Nongstoiñ, Nohprah 8: Hadien ka jingmih khubor ha u Mawphor ha ka sngi balang halor ka jingthmu ban lilam ïa ka Inspection Bungalow jong ka tnad PWD sha ki riew shimet, ki nongïalam bad dkhot jong ki saw tylli ki sengbhalang kiba kynthup ïa ka WKSU, UHM, MYF bad WYF ka West Khasi Hills District, ki la pynpaw ka jingsngew lyngngoh haba ïohi ha ka kot khubor Mawphor kaba la mih ha ka ka 7 tarik, kaba la thoh shaphang ka jingthmu ban ai wai noh ïa katei ka IB PWD ha ki riew shimet.
Ki saw tylli ki seng ha ka sngi palei ki la leit ban ïakynduh ïa u EE ka tnad PWD ban pan jingshai ba hato kane ka dei kaba shisha ne kumno. Ha ka jingshisha, ka PWD lada ka kwah ban pynïaid ïa kane ka IB, ka dei ban ïaid katkum ki lynti da kaba khot tender ban pyllait paidbah ïa ka legal tender bidding system ha ki kot khubor bapher bapher kiba don ha ka Jylla.
“Na ka liang jong ngi ki kynhun ki sengbhalang ngi dawa na ka office ban pynsangeh mardor kat bym pat shai halor kane ka kam. Ngi dawa na u Executive Engineer ba u dei ban pynshai halor ki nongrim ba balei ban ai wai sha ki riew shimet ïa katei ka IB PWD”.
“Na ka liang u Engineer u la kren shai hakhmat jong ngi ki nongïalam sengbhalang ba um tip ei ei halor kane, namar u khlem pat ïoh jingtip ei ei haduh mynta. Hynrei la sngewthuh ba ban ïa u Executive Engineer u ba dei tang u rit u ria ha ka tnad PWD, kham tip bha u Chief Engineer. Namar, dei ma u ba batai bad pynïaid kumno ban leh. Hynrei, ngi kum ki kynhun jong ki saw seng ngi buh ki jingdawa na ka office ban pynshai, mynno la pyllait advertisement ha ki kot khubor la ka long ha ki regional news paper ne local news paper”.
“Na kaei ka daw la hap ban ai wai noh ïa ka IB PWD ha ki riew shimet, haba ka dei hok ka jingdon jingem jong ka sorkar. Hato katno la ai wai ïa kane ka IB PWD la ka dei man u bnai lane ha ka shi snem bad balei khlem da khot da ka legal tender halor kane ka kam. Kawei pat ka long da lada u EE bad u CE kim ïatreilang kamut ba ka don ka jingbym sngewthuh jingmut hapdeng jong ki”, ong ka kyrwoh na ki nongïalam jong ki saw seng.
“Ka long kaba lyngngoh ba baroh shikatta lada pynïaid hi da ki tnad sorkar kum ka IB Soil nangta ka Circuit House, kine baroh ki ïaid beit bad ryntih. Ka jingkylli ka long balei ka tnad PWD ka mut ban shu pynlong private property ïa ka jingdon jingem jong ka tnad sorkar”, buh jingkylli ki saw seng.