Lymda ngim ïada noh mynta kan kylla ri shyiap tang hapoh 50 snem: Teinwell

Sohra, Nohprah 07: Kum shi bynta ban wanrah ïa ka jingieid bad jingñiewkor ïa ka spah mariang bad ki jingthaw jingshna khamtam eh ïa ki jingkieng jri kiba u longshuwa u la ai pateng sha ki longdien ka shnong Tyrna, Tyrna Elaka ha ka sngi Balang ka la plie ïa ka tamasa 2nd Living Roots Festival ba ar sngi bad kaba yn pynkut ha ka sngi Palei ha ka shong Tyrna ha ka kaba u Lamphang ka Ïing Dorbar Thaw Aiñ ka jylla u Bah Metbah Lyngdoh la wan shim bynta kum u kongsan ha ryngkat ka jingsynran lang u MLA ka thaiñ u Bah Balajied Kupar Synrem, u MDC ka thaiñ u Bah Teiñwell Dkhar bad kiwei kiwei ki nongshah khot sngewbha.
Kane ka jingpynlong ïa kane ka Festival ka long shi bynta ban pynkynmaw ïa ki pateng ba mynta ban long kiba phikir ïa ki jingai ka mariang bad ki matti kiba u longshuwa u la ai pateng ïa ki longdien khmatm eh ïa ki jingkieng jri kiba la lah wat ban khring ïa ki nongjngohkai pyrthei na sha kiwei pat ki bynta ba jngai jong ka pyrthei ong u Bah B Marbaniang u Chairman ka Tourism Management Committeejong ka Dorbar Shnong Tyrna Elaka Tyrna Sirdarship kaba dei ka komiti ba pynïaid ïa kane ka tamasa, ha ka jingkren maitphang jong u.
Haba kren ha kane ka sngi, u Bah Metbah Lyngdoh u la ong ba kum ki long mynta ka dei ka kamram jong ngi ban ïada ban ban kham pynbha pynjanai ïa kane ka jingkieng jri kaba ngi la ïoh pateng.
U la ong ba ka jingdon kane ka jingkieng ym tang ba ka lah ban pun lynti na shiliang ka wah sha shiliang wah hynrei ka lah ban wanlam ïa ki nongjngohkai pyrthei kiba wanrah pat ïa ka jingïoh kamai ïa ki trai shnong bad ki shnong kiba marjan.
“Lada ngi shna ïa kawei ka jingkieng kaba da ka dewbilat ha ka jaka ka jingkieng jri yn ym don satia uwei ruh uban wan jngoh ïa kata ka jingkieng, hynrei ka jingdon kane ka jingkieng jri ka la lah ban khring ïa shibun bah ki nongjngohkai pyrthei ym tang na ka jylla bad na ka ri hynrei wat na shabar ruh, namarkata, ka dei ka deiti jong ngi ki longdien ban ïada bad kham pynbha shuh shuh ïa ki,” kyntu u Bah Metbah.
Haba kren kum u riew rangbah uba la kham san ka rta uba la ïohi ïa ka jingïapher tang ha kine ki sanphew snem tam kiba la leit, u bah Teiñwell u la ong ba ka jinglong ka mariang ha ka thaiñ ka la pher bak lybak lada nujor tang ha ki khyndiat phew snem kiba la leit ha kaba ha ki por kiba kham mynshuwa ki sim ki doh ki bun byllai katba mynta tang ka syrngiew jong ki ym ïohi shuh.
“Dang ha ki khyndiat phew snem lada ngi shong kali ban leit sha Sohra na shnong Mawlong ngin kynduh ïa ki mrad khlaw ba bunjait naduh ka skei, ki khla bad ki jait mrad ba bunjait lada phi ïaid lei da ka kjat sha ki khlaw ki btap ynnai ïa ong, hynrei mynta tang ka syrngiew jong ki phin ym ïohi shuh bad kane ka jingbeh spah lei ban tih ban khlong lut ïa ki jingai ka mariang ka long kaei kaei kaba nga i tieng ïoh kan kylla ri shyiap tang ha ki khyndiat snem ban wan,” ong u Bah Teiñwell.
Shuh shuh u la bynrap, “Ha ki thaiñ war Mawlong lei ka jingbeh spah than ka pynlong ban tih ban khlong ïa ki maw bad ki lum ki wah bad ka jingdon ki pajwa thang shun ki briew kim map shuh wat ban khet bad pynkyllon ïa ki dieng jri ban ïoh dieng ban thang shun ha ki pajwa bad lada kane ka bteng kumne nga itieng ïoh ba tang hapoh sanphew snem kane ka ri war jong ngi kan kylla ri shyiap noh,” kren bynñiaw u Bah Teiñwell bad bynrap, “Kane ka jingkren kam dei ba nga bishni ïa kito kiba trei ïa kane ka kam hynrei ba lada ngi leh khlempyrkhat shuh ïa ka mariang ka long ka jingma ba khraw ym tang ïa ka mariang hynrei khamtam ïa ngi ki khun bynriew.”
U Bah Balajied Kupar Synrem ha ka jingkren jong u u la ai ka jingïaroh ïa ka sienjam kaba ka shnong ka la shim ban wanrah ïa ka jingsngewthuh ïa ka jingdonkam ban ïada bad pynneh pynsah bad na ka liang jong u u la ai ka jingkular ba un ai ka jingikyrshan ym tang ha kane ka kynti hynrei ha ki snem kiban dang wan ruh.
Ha kane ka sngi kum ka dak ka jingplie ïa kane ka tamasa u Bah Metbah Lyngdoh u la pynher ïa ka Panur.
Lah ban sakhi ba kane ka tamasa ka long ruh kaba kham pher ha kaba na ka liang ka komiti kaba pynlong kam shym la pyndonkam satia da ki plastik hynrei tang da ki jingai beit ka mariang naduh ki dara bad ki dukan ba la shna, ki jingpynitynnad ïa ka sawdong sawkun ka madan bad kiwei kiwei kiba la shna na bynta kane ka tamasa.