Ujor ka HITO sha ki bor District Ri Bhoi ban pyrshah ïa Company Indradhanush Gas Grid

Nongpoh, Nohprah 07: Ka Seng Hynniewtrep Integrated Territorial Organization (HITO), Ri Bhoi District mynta ka sgi ka la pynher syndon da ka jingthoh sha ka bor sysnhar district Ri Bhoi na ka bynta ban pyrshah ïa kawei na ka Company ba la tip kum ka Indradhanush Gas Grid Limited, kaba dei ka Kompany kaba thmu ban pyntrei ïa ka project ban pynpoi Gas lyngba ki Pipe line ba ïaid lyngba na Ri Bhoi sha kiwei kiwei ki jylla hapoh ka thaiñ Shatei Lam Mihngi ka ri India.
Ka daw kaba la pynlong kumba la pynpaw ha katei ka jingthoh ba la ujor sha ka ophis u Deputy Commissioner ka Ri Bhoi bad sha u ADM ba peit ïa ka tnad Revenue, ka dei halor ka nongrim ba katei ka Company ka la shu wan ban pyntrei ïa katei ka project khlem da ioh bor da ki bor shnong bad ki bor Raid, ha kaba ïa ka kam ban tih ïa ki pipe line la shu leh sop sop khlem da tip ki paidbah.
Ka seng ka la urjor ruh hadien ba ka la lap ba kane ka Company ka la wan pyntreikam ïa ka project ban tih ïa ki Pipe line ban pynpoi gas khlem da ïaid da ki bor shnong bad ki bor Raid bad ka la nud ban wan rah ïa ki JCB ban trei khlem da ioh NOC na ka bor shnong bad kawei na ka shnong kaba la mad ïa kane ka jingleh sop sop katei ka Company ka dei ka Shnong Mawbri.
Na ka liang ka seng ha katei ka shithi ujor, ka la buh jingkylli ruh sha ka bor synshar District ba kumno kane ka Company ka la nud ban pynïaid ïa ka kam khlem kano kano ka jingpynshai sha ki paidbah (Public Hearing) ha man la ki shnong ba shah ktah lada tih ïa kitei ka thliew ban pynïaid ïa ki Gas Pipe line bad kumba la pynpaw da ka seng katei ka Company ka la shu khot ban pynlong ïa ka Public hearing tang katto katne ngut ki trai jaka khlem da tip ki paidbah bad khlem da ioh jingpynshai na katei ka Company halor kane ka projek.
Ka seng ka la pyntip ruh ba dang ha ka 5 tarik u Nohprah 2022 ha ryngkat ki nongïalam shnong ka Shnong Mawbri bad ka seng ki la lap ba kane ka Company kala wan rah ïa ka JCB ban sdang ïa ka kam bad ban pynhap ïa ki Pipe Line ha Pynthor kba ha Mawbri khlem da tip ka shnong bad ki paidbah, ha kaba kane ka jingleh sop sop kane ka Company ka la pynbitar ïa ki paidbah bad wat ïa ki nongïalam ka seng.
Namar kata, na ka liang ka seng lyngba katei ka shithi ba ka la ujor sha ka bor synshar District ha ka ophis u Deputy Commissioner ka Ri Bhoi, ka la kyrpad ïa ka bor synshar District ba kan tuklar mardor ïa kine ki kam leh sop sop kane ka Company bad ka dawa ruh ba dei ban pynsangeh mardor ïa ka kam katba katei ka Company kam pat lah ban pynshai paidbah halor katei ka Projek bad ban ïaid katkum ki lynti ba dei ban ïaid kaba long kaba shai sha ki paidbah.