Kyntu ka KSU-NC ïa ka sorkar ban shna noh ïa ophis Block ha Lumshnong-Narpuh

Khliehriat Nohprah 7: Ka Khasi Students Union Narpuh Circle ka ai ka jingkhublei ïa ka sokar MDA ba la lam khmat da u myntri rangbah ka jylla, u Conrad Sangma, kaba la pynurlong ïa ka C&RD Block ha Lumshnong Elaka Narpuh, kaba dei ka jingdawa kaba la slem bha ba la dawa da ki paidbah bad ka seng, ha kajuh ka por ka seng ka kyntu jur ïa ka sorkar ba kan pynkloi noh ban shna noh la ka jong ka ophis kaba dei na ka bynta ka C&RD Block, ym ban shu pyndonkam slem than da kane ka ophis kaba la mang na ka byntaban pynlong ïa ka Skill and Development Centre ka ban long ka jingmyntoi ïa ki paidbah khamtam kito kiba don sap.
“Mynta ngi dap da ka jingsngew kmen ba la lah ban pynurlong ïa kane ka C&RD Block ha Narpuh kaba long ka ophis kaba donkam bha jong ki paidbah ka ban wanrah ruh ïa ka roi ka kiew ha ka thain ban kyntiew ïa ka ïoh ka kot jong ki paidbah” pynpaw u General Secretary KSU Narpuh Circle, u samla Sanatomba Bamon”
La ong ruh ba ïa katei ka ophis C&RD Block ba dang shu dep plie shen ha Lumshnong ka dei kaba la tei lyngba ka jingbei tyngka na ka District Mineral Funding Trust kaba la mang na ka bynta ka tnat Skill and Development ban kyntiew ïa kito ki briew kiba don sap bad kumjuh ruh ban kyntiew ïa ka ioh ka kot jong ki paidbah ka thaiñ, kane ka tnat Skill and Development kan ïarap ruh shibun ban kyntiew ïa ka iohkam iohjam jong ki samla jong ka thaiñ, kumta ka seng ka kyntu jur ïa ka sorkar ba ka dei ban shna noh kham kloi ïa ka ophis jong ka C&RD Blcok ha shnong Lumshnong, ym ban shu pyndonkam sah da katei ka ophis Skill and Development ha kajuh ka por ka seng ka kyntu ïa ka sorkar ba ka dei ban plie noh kloi ïa ka tei ka ophis Skill and Development kaba don ha Lumshnong kaba la dep shna ym ban shu shim kabu than da kaba pynlong ophis C&RD Block.
Na ka liang ka seng ka pynpaw ruh ïa ka jingsngew lyngngoh ïa ka jingbym pynbna eiei ïa ka mang tyngka kaba na ka bynta ban shna ïa ka ophis C&RD Blcok ha shnong Lumshnong, namar ha ka por ba u myntri rangbah ka jylla, u Conrad Sangba u wan ban plie ïa ka Wapung C&RD Blcok u la pynbna ruh ïa ka mang tyngka kaba T3 klur tyngka na ka bynta ban shna ïa ka ophis C&RD Block ha Wapung, hynrei ha Narpuh pat ym shym la pynbna satia ïa kano kano ka mang tyngka, halor kane ruh na ka liang ka seng ka buh ïa u kyrwoh sha ka sorkar da kaba ong “Ko sorkar wat ju ialehkai bad ki paidbah bad wat ai ba kane ka jingwan plie ïa ka ophis C&RD Blcok kan long tang kum ka shynrong lane ka rongphong kaba paw shabar, hynrei haba wan ban buh ophis da wanrah ruh bad ka mang tyngka kaba biang, wat ju wan ban lehkai bad ki paidbah kiba lui lui”
Ha kaba ïadei bad ka ophis Block, ka KSU Narpuh Circle ka kwah ba ka sorkar ka dei ban da pynurlong bad ki kam ruh ban da shna ruh ïa ka ophis ym ban shu pynbna tang ïa ka mang tyngka kumba long ïa ka Wapung C&RD Block, u Conrad Sangma myn ha ka 16 tarik u nohprah 2021 ha ka por ba u wan plie ïa ka ophis C&RD Block u la pynbna ruh ïa ka mang tyngka kaba T 3 klur tyngka ban shna ïa ka ophis C&RD Block ha Wapung, phewse haduh mynta ym don eiei ruh bad khlem iohi dak eiei ruh ha kaba ïadei bad ka jingshna ophis Block ha Wapung.