Pyllait paidbah u MLA ka Ranikor Constituency ïa ka MLA Scheme kaba kot 5 klur ha Ranikor

Mawkyrwat, Nohprah, 07: U bah Pius Marweiñ, Nongmihkhmat jong ka Ranikor Constituency ha ka sngi balang jong ka taïew ka 7 tarik u Nohprah, 2022 ha ka jingsakhi jong ki paidbah, u la ïoh ban pyllait paidbah ïa ka MLA Scheme na ka bynta ki ar tylli ki snem kata jong u snem 2021-22 bad 2022-23 kaba kot mar T. 2.5 klur bad kaba dei ruh ka jingpyllait skhim ba khadduh ba la pynlong hapoh madan jong ka shnong Ranikor, South West Khasi Hills District.
Lah ban kdew ba ki lad pynroi na ka bynta u paidbah ba la pyllait mynta ka sngi ki long na ka bynta ki 6 tylli ki shnong ha kaba la sam da ki tin sop ïing ïa 38 tylli ki longïing kiba donkam ïa ki lad jingïarap, ka jingsam ïa ka song pisa kaba mar T. 10 hajar tyngka sha ki 25 ngut ki briew khnang ba kin ïoh ki jingmyntoi ban pyntyllun ïa ki kam ha kaba ïa dei bad ka rep ka riang, ka ri jingri bad kiwei de ki kam ba ki ki thmu, bad ka jingsam ïa ki work order na ka bynta ban shna ïa ki jingtei kum ki ïing skul bad ki lynti ïaid kjat.
Ha kajuh ka por ym tang mynta ka sngi ba kum u MLA u la ïoh ban sam bad pyllait ïa kane ka skhim hynrei la ai jingtip na ka bynta kiwei de ki shnong ki bym shym la kynthup ha kane ka sngi ynsa leh bad pyndep ïa ka jingsam nangne shakhmat ha ki shnong jong ki hi.
U bah Pius Marweiñ, MLA/MDC jong ka Ranikor Constituency, haba kren ha ka jingïalang u la ïathuh ba naduh ba sdang hi kumba u la kular ban sam ïa ki lad pynroi ne ki skhim ha kaba shit ha kaba shai kumta ruh ryngkat ka jingsakhi paidbah naduh u snem 2018 haduh mynta na ka liang jong u ryngkat ka jingwanrah jong ki shnong ïa ki kyrteng jong kiba dei hok ban ïoh ki jingïarap la dep ban leh ïa kaba donkam bad la aiti ha ki naduh ki tin sop ïing, ka song pisa na ka bynta ki jingdonkam jong ki, ki kot ne ki work order ban shna ïa ki jingtei kum ki ïing skul bad ki lynti ïaid kjat ryngkat ka jingsakhi lang da ki paidbah jong ka shnong.
U la ïathuh ba wat ha ki ar snem ba don ka khlam jingpang corona virus ruh kum MLA jong ka dong ka thaiñ um shym la shongthait hynrei u la trei ïa la ka jong ka kam da kaba pynroi ïa ki lad pynroi lyngba ka MLA Scheme sha u paidbah ryngkat ka jingïasngewthuh lang bad ki nongpynïaid shnong namar ha kito ki por ym shah ban pynlong ïa ki jingïalang paidbah kiba kum kine. Namarkata, u la pynshai ruh ba ha kane ka jingsam ïa ka MLA Scheme ki don ruh ha la ki jong ki jong ki bynta ha kaba ki don ki longïing kiba ïoh da ki tin sop ïing, ki don ki longïing kiba la mang da ka song pisa, ki don ki shnong ba la ai da ki shuki, ki generator, ki tiar pynsawa bad kiwei de ki jingdonkam.
“Na ka mang pisa kaba T. 2.5 klur jong u snem 2022-23, la dep ban pynkhreh ban ai ki work order kiba la dep ban mang T. 1 klur 12 lak ban shna ïa ki ïing skul, ki Community Hall, ki lynti ïaid kjat sha ki jaka jngohkai pyrthei”, ïathuh u bah Pius. U la bynrap shuh shuh ba tang kiba la ïoh jingïarap lyngba ki tin sop ïing kam duna shuh ïa ka 5 hajar ïing ei ei, kiba ïoh ban kyntiew ha ka kam rep kam riang, ka ri jingri bad kiwei de ki kam ki la kot kumba 3 hajar ïing bad haba kheiñ lyngba kane ka jingïarap na kane ka MLA Scheme ka la kot haduh 8 hajar ïing.
Namarkata, u la buh ka jingkyrpad ïa ki bym ïoh bynta ha une u snem ba mynta ba kin long kiba ïai shah namar kin sa ïoh bynta de ha kiwei pat ki snem lada kum ka party UDP kan ïoh biang ïa ka jingjop ha kane ka MLA Election ban sa wan.
Kiwei pat ki nongkren ki long u bah C. Nongbri, Working President jong ka UDP Ranikor Circle, u bah Silbest Thongni, Myntri Shnong Ranikor ha ryngkat ka jingïadonlang kiwei de ki riew rangbah, ki longkmie longkpa bad kumjuh ruh ki nongïoh bynta na kane ka MLA Scheme.