Mawkyrwat, Nohprah, 07: Kawei ka jingjia ba sngewsih ka la wan jia ïa uwei u samla na ka shnong Mawsep, South West Khasi Hills District ha kaba u la khlad noh ha shen hadien ka jingjia ïa tyngkhuh kali ha kawei na ki jaka hajan ka jingkieng ka shnong Jashiar, South West Khasi Hills District.
Katkum ka tyllong khubor na ki pulit la ong ba kane ka jingjia ka dei ha ka por kumba 3:45 janmiet ha kaba kawei ka kali ar shaka (bike) kaba don ïa u number ML 05 T 8168 ba la ñiah ha ka jingstet ka la ïa kynduh bad tyngkhuh bad kawei ka bos kaba don ïa u number ML 04 A 0715 ha kawei jaka ba dang hap ha ka shnong Marshillong hajan jong ka jingkieng Jashiar ba la ñiah da u samla (L) Kherlin Mawlein uba ha ki karta 31 – 32.
Halor kane ka jingjia na ka liang ka Mawkyrwat Police Traffic ki la leit ban jurip ha katei ka jaka ba jia bad ïa ka met jong ula rah noh hapoh CHC Mawkyrwat ban pyndep ïa ki jingdonkam baroh.
Ka jingtohkit halor kane ka jingjia ka dang ïaid shakhmat.
