Nongpoh, Nohprah 06: Ban ai jinghikai bad ban kyntiew ïa ki nongrep ha ka liang ka ioh ka kot lyngba ki kam rep ki kam riang, ka Ri Lajong Farmer Produce Organization ryngkat ka jingïatrei lang ka College of Post Graduate Studies in Agricultural Sciences, Umïam ha ka sngi Saitjaiñ ki la pynlong ïaka prokram ai jinghikai halor ka kam rep Tyrso kaba ki nongrep ki lah ban thung ïa u Tyrso ha ki pynthor Kba
Ïa kane ka prokram ai jinghikai la pynlong ha ka Shnong Umklai ha kaba la wan ban shim bynta da kiba bun ki nongrep bad ki scientist na College of Post Graduate Studies in Agricultural Sciences, Umïam ki la wan ban ai jinghikai kumno ban thung Tyrso ha ki pynthor kba.
Nalor ki nongrep kiba la wan shim bynta ha kane ka prokram ai jinghikai bad ki Scientist na College of Post Graduate Studies in Agricultural Sciences, Umïam, ha kane ka sngi la don lang ruh ka Kong Marian Maring, kaba dei ka President ka Ri Lajong Farmer Produce Organization, Ri Bhoi bad u Paralat Toor, Vice President ryngkat kiwei kiwei ki nongïalam ka Organization.
Lyngba jong kane ka sngi, ka College of Post Graduate Studies in Agricultural Sciences, Umïam bad ka Ri Lajong Farmer Produce Organization, Ri Bhoi ki la sam ruh ïa u symbai Tyro bad kiwei ki symbai jhur sha ki nongrep kiba la wan ban shim bynta ha kane ka prokram ai jinghikai ban kyntiew ïa ka ka kam rep Tyrso da kaba rep ha ki pynthor Kba.
Kumba la pynpaw da ka Kong Marian Maring, president ka Ri Lajong Farmer Produce Organization, ka jingthmu ba la pynlong ïa kane ka prokram ai jinghikai, ka dei shi bynta ban pynshlur ïa ki nongrep ban rep ïa u Tyrso ha ki pynthor kba khlem da pyndonkam dawai bad ha kajuh ka por ruh ban kyntiew ïa ka ioh ka kot ki nongrep lyngba ki kam rep ki kam riang kiba ngim donkam shuh ban dang pyndonkam dawai khnang ba kan nym ktah ïa ka koit ka khiah ki paidbah kiba bam ïa ki jhur ba rep ki nongrep.
Shuh shuh, ka la ong ruh ka Ri Lajong Farmer Produce Organization, Ri Bhoi ryngkat ka jingïatrei lang bad ka College of Post Graduate Studies in Agricultural Sciences, Umïam ki don ïa ka thong ban kyntiew ïa ki kam rep ki kam riang kiba ym da donkam shuh ban pyndonkam dawai khnang shngaiñ ki nongbam bad ha kajuh ka por ruh ki don ïa ka thong ba ki nongrep ki dei ban kiew ha ka la liang ka ioh ka kot lyngba ka kam rep bad ruh ba kin lah ban ieng ha la ki jong ki kjat lyngba ki kam rep ki kam riang, ka la bynrap.
