Plie lad ka Seng Samla Shnong Sohkhylam ïa ki samla ban pyni la ki sap ki phong

Mawkyrwat, Nohprah, 06: Ka Seng Samla Shnong Sohkhyllam da ka jingthmu ban ai mynsiem na ka bynta ki samla jong ka shnong Sohkhyllam ka la ïoh ban pynlong ïa ka jingaikhusnam bad pynkup burom ïa ki 4 ngut ki samla ba la leh bha ha ki eksam bapher bapher bad kumjuh ruh ka jingpyni sap ne ka Talent Show jong u snem 2022.
Ïa kane ka prokram ka pynlong hapoh ka Sohkhyllam Resource Centres ha kaba ki la don haduh 20 ngut ki nongïashimbynta ban pyni ïa ki sap kyrpang bapher bapher ba ki samla ki don kum ha ka Jingshad, Jingrwai, Jingdro Dur, bad kiwei kiwei de.
Hadien ba kut ka prokram, la ïoh ruh ban pynbna ïa ki nongjop ha kaba u Hamebanjop Jyrwa ha ka kyrdan ba nyngkong, ka Kynhun Shad Tynrai ka Susana & Group ha ka kyrdan ba ar bad ha ka kyrdan ba lai la ïoh da u Deibanjop Syiemlieh bad ha ryngkat ki 5 tylli ki khusnam kyroang.
Ha katei ka sngi na ka liang ki nongkren ki la ai jingïaroh ïa ka Seng Samla Shnong kaba la pynlong ïa kum kine ki program ki ban long kawei na ki lad ban pynshlur ïa ki hep kiba rit bad kumjuh ruh ki khun samla shynrang bad kynthei jong ka shnong ka thaw ba kin lah ban pyni bad sei ïa ki sap ki phong ba ki ki don bad ha kajuh ka por kiba long ki lawei na ka bynta ka shnong, ka ri bad ka Jaidbynriew.
“Lyngba ka jinglah jong ki khun samla ban pyni bad pyndonkam hok ïa ka sap ba ki ki don kan long kawei na ki lad ba kin ïoh ban kamai jakpoh ha ka jingim ka jong ki”, ki la ong.
U kongsan ha kane ka sngi u dei u bah Sounder Strong Cajee, u ba dei u kyrtong jong ka TMC na Mawkyrwat Constituency, ka kong Shidalin Marngar kum ka symbud kongsan, u Myntri Shnong Soh-khyllam, bah P. Wanniang, ka kong Loris Jyrwa bad kiwei kiwei ki Rangbah, ki Longkmie bad ki nongkitkam jong ka Seng Samla Shnong ryngkat ruh ki hep barit.