Ba kren beiñ ïa kiba duna dkhot met dawa ka KDA ban panmap u kyrtong Congress hapoh 24 kynta

Shillong, 05 Nohprah: Ka Khasi Disabilities Association (KDA) kaba dei ka kynhun jong ki briew kiba don ki jingduna dkhot met ka pynrem jur ïa u kyrtong ka jong ka Congress uban ïakhun ïa ka elekshon MLA na kaban long ha u 2023 na Sohïong u Bah S. Osborne Kharjana halor ka jingkren jong u kaba la ktah matïong ïa ki briew kiba duna ka dkhot met, bad ki la dawa ba u dei ban panmap na ki hapoh 24 kynta lyngba ki lad pathai khubor halor ka jingong jong u ba haba jied nongmih khmat dei ban jied da kiba biang pura ki dkhotmet ym da kiba matlah, kiba kyllut ne ki bym laitkren bad ïa kito kiba don jingduna dkhotmet namar ki dei kiba don jingduna kin ym lah ba synshar ïa ka jylla.
Haba kren sha ki lad pathai khubor ki dkhot ka seng ki la ong ba kane ka long pynban kum ka jingpynduh mynsiem ïa ki, bad ka ban ïalam bakla ruh ïa ka imlang sahlang ban beiñ ban khoh ïa ki ban ba kin pynlong kiba shah kheiñpoh ruh ha ka imlang sahlang.
U dkhot ka KDA u Bah Benister Kharpor uwei napdeng kiba don jingduna ha ka bor ïohi u la ong ba ka jingsngewsih palat ka long namar ka jia ryngkhat ba hadien 10 snem, ki briew kiba duna ha ka dkhot met ki la shah beiñ shah khoh biang ha ki nongïalam bad u la ong ba kane ka pynpaw ïa ka jing long jyndong ka jingmut jingpyrkhat jong ki nongïalam.
Shuh shuh ka Kong Bertina Lyngdoh kaba dei ruh kawei na ki nongthoh ha ki lad pathai khubor bad kaba nyngkong tam na ka jylla napdeng kiba don jingduna ha ka bor ïohi ban pyndep ïa ka MA ha ka English bad kaba la pyndep ruh ïa ka National Eligibility Test, ka la ong ba lada peit ïa ka jingkren une u kyrtong ba wat ma u ruh u don ka jingduna ha ka bor pyrkhat lada u dang kheiñ ba kiba don jingduna ka dkhot met kim lah ban ïashim bynta ha ka imlang sahlang, “lada phi shu kren khlem da pyrkhat ïano kan pynmong, ka pynpaw shai ba ma phi ruh phi dang don hapdeng ka jingduna ha ka bor pyrkhat,” ka la ong.
Ka la ong ruh ba kane ka jingkren jong une u kyrtong khlem da pyrkhat ba ka jingkren jong u ïano kan pynmong kadei tang ka jingkren khunlung bad ka la ong ba u la pynkheiñ ruh ïa ka Right of Person With Disabilities Act 2016.
“Ka aiñ Right of Person With Disabilities Act 2016 ka aibor ïa ngi ban ïadon bynta lang ha ka imlang sahlang, hynrei lada une u candidate u kren kumne, ka pynrem ïa ngi,” la ong ka Kong Bertina Lyngdoh.
U President ka seng Federation of Person with Disabilities u Bah Sterwin Kharjana u la ong ba namar ka jingpyntreikam ïa ka RPWD ACT 2016, “ka District Social Welfare ka la ai bor bad thung ïa ki briew kiba duna ka dkhot met ha man la ki shnong ba dei ban don beit uwei uwei ha ki committee jong ka shnong.” u la ong.
U la kynthoh ba kane ka jingkren jong une u kyrtong pat, ka pynrem pynban lada u ong ba kiba duna kim lah ban ïatreikam lang ha ki kam shnong kam thaw.