Shillong, Nohprah 5 : I MLA jongka Laitumkhrah Constituency iba la shah sospon ha ka seng Congress I Dr Ampareen Lyngdoh in sa rung noh sha ka party kaba thymmai kata ka National Peoples Party (NPP) hadien ka 10 tarik Nohprah 2022.
La thikna beit ba in pynïasoh sha ka NPP namar ki nongïalam ka NPP ki la pynthikna ïa ka jingwan rung jongi sha ka party.
Haba ïakren bad ki nongthoh khubor mynta ka Sngi I Dr Ampareen Lyngdoh i la ïathuh “ Nga la jan dep ka jingïamir jingmut bad ki paid nongkyrshan jong nga baroh sah sa tang katto katne ngut eh kiba nga dang hap ban ïakynduh bad hapoh ka 10 tarik une u bnai ngan pyndep lut bad hadien kata nga sa shim ïa ka rai”.
Na ka liang jong i ruh i la pynbna ba shen yn sa pynïasoh sha ka party ba thymmai tangba im pat treh ban ïathuh sha kano ka party. “ Phin sa ïohi ba hadien ka 10 tarik u Nohphrah ngan sa pynïasoh bad ka seng saiñ pyrthei kaba nga la don jingthmu hi ban pynïasoh”.
I la ong ruh ba ha ka election 2023 ym dei tang ba i kwah ban jop election marwei hynrei yn ïa trei lang ban jop bun na kata ka party kaba i la thmu ban rung.
“ Ngim ju kheiñ troiñ ïakiwei ki party ne ngi sngewskem ba ngin jop beit hynrei nga kwah ban ïohi ba nga leit sha kata ka party da kawei ka jingthmu bad kata ka long ban wanrah ïaka sorkar kaba skhem ha kane ka jylla” ong i Dr Ampareen.
Na ki san ngut ki MLA ka Congress kiba la shah sospon ki ban pynïasoh sha ka NPP kin long I Dr Ampareen Lyngdoh, bah Kimfa Marbaniang bad u bah Mohendro Rapsang. Katba ki arngut kiwei pat u bah P.T Sawkmie bad u bah Meralborn Syiem kin pynïasoh sha ka UDP.
