Shillong, Nohprah 05 : Ka Laitdiengsai kadei ka shnong kaba dang rit bha ha ka thaiñ Mawkynrew Block hynrei ka la lah pat ban sei ïa u samla uba la ïoh ban khur ïa ka takma ksiar ha ka North East Olympic Games kaba dang shu lah shen na ka jingïalehkai Karate.
Utei u samla ba dang 18 snem ka rta ba tip kyrteng kum u Paul Benny Kharmudai u dei u khun jong i Kong R Kharmudai bad ïa katei ka jingïalehkai u la lah ban pyntbit ha ka shlem jinghikai jong ka Sports Authority of India.
Kum ka dak ka jingithuh ïa ka burom kaba utei u samla rit u wanrah ïa ka jylla, ïa ka Block bad ruh ïa ka shnong hi baroh kawei, na ka liang ka UDP Mawkynrew constituency ha ka sngi Nyngkong ka la pynlong da ka jingpynkup burom kaba shongkun bha ha ryngkat ka jingsnohkti lang bad ka shnong Laitdiengsai.
Ka jingpdiang burom ïa utei u samla ka la sdang naduh lad ban leit sha Laitlum ter ter ha kaba ki samla ryngkat ki paidbah ki la ïaid da ka kjat haduh jaka ba long jingïalang ha ryngkat ka kynhoi ka risa bad ka phawar.
Na ka liang u President ka UDP Mawkynrew Bah Remington Pyngrope haba kren haba kren ha ka jingïalang u la ong ba kum ka thaiñ Mawkynrew ki sngewsarong haduh katta katta ba na ka shnong Laitdiengsai la mih u samla uba la kyntiew shisha ïa ka burom jong ka shnong bad jong ka thaiñ baroh kawei.
“Kane kadei tang ka jingsdang bad nangne shakhmat phi dei ban ïakhun tyngeh bad buh ka thong ban khur ïa ka takma ksiar wat ha ki lympung National Games ne wat ha ki International ruh,” u la ong da kaba pynkup burom artad ïa u da ka song kyrpang. U la pynpaw ruh ba kum ka pary ki don ïa ka thong ban kyntiew bad plie lad ia ki samla ka thaiñ kiba don ïa ka sap kaba kyrpang ba shen kin sa pynlong ruh da ka lympung kaba heh bha na bynta jong ki.
Shwa kane, ka UDP Youth Wing Mawkynrew ka la pynkup burom kyrpang ïa ka kmie jong utei u samla, ka Kong R Kharmudai ha shwa ba kan pynkup burom ïa utei u samla ba khur takma ksiar. “Kane ka jingpynkup burom ïa ka kmie jong u samla Paul Benny kadei namar ngi tip ba dei ka kmie kaba kyrshan bad ai mynsiem ïa u khun haduh ba un da poi shaduh kane ka kyrdan,” ong u nongïalam ka Youth Wing.
Na ka liang ka Executive Comittee jong ka shnong ruh ka la pynlong ïa ka jingpynkup burom kaba kyrpang da kaba ïa ka thup buh jingkynmaw na ka bynta utei u samla.
Ki nongïalam shnong Laitdiengsai kumjuh ruh na ka Laitdiengsai Sports Club kynthup ïa ka Kur Kharmudai ki la pynpaw lang ka jingkmen ban ïohi ba uwei na ki nongshong shnong u la poi haduh katei ka kyrdan. Ki la ai ruh ka jingkitbok ba un lah ban khur takma ha ki lympung iakhun kiban wan khamtam eh ban khur takma ha ki lympung bah heh ha ka Ri.
Shwa kane, na ka liang u Bah Kansing Lynshiang, kyrtong ka NPP na Mawkynrew u la wan ban donlang shipor ban pynkup burom ïa utei samla bad ai ruh ka jingkitbok ïa u na ka bynta katei ka burom kaba u la wanrah na ka North East Olympic Games kaba long ka jingsarong ym tang ïa ka Meghalaya hynrei khamtam ïa ka thain Mawkynrew bad khamtam eh ïa ka shnong Laitdiengsai.
Katba na ka liang u Coach jong utei u samla u la ïathuh ba u Paul Benny u lapyni shisha ïa ka jingtbit bad ka jingkut jingmut ban leh bha bad trei shitom naduh ba u wan ban shah hikai ha ka SAI. U pynpaw ruh ka jingkyrmen ba ha kawei ka sngi utei u samla un sa lah ban paw wat ha ki lympung ba heh ha ka Ri.
Ha katei ka janmiet na ka liang utei u samla bad ki paralok na SAI ki la pyni paidbah shaphang ka jingïalehkai Karate kaba bun na ki nongshong shnong kim ju kham ïohi ha ki lympung ïakob.
La pynshongkun ïa ka jingïalang da bun bha ki jingrwai, jingshad bad ruh ki jingphawar.
