Nongpoh, Nohprah 03: Kum shi bynta ban kyntiew bad ban ai mynsiem ïa ki khun samla ha ki jingpule, ba kin dang kham leh bha shuh shuh haki jingpule jong ki ba kham shalor, ka seng samla jong ka shnong Pahamsyiem ha ka jingïalam u samla Balabuhskhem Marbaniang kum u president, u samla Banbud-dien Suting vice president ha ryngkat bad ki dkhot nongkit kam jong ka seng samla shnong, mynta ka sngi ka 1 tarik Nohprah, pynkup burom da ki khusnam sha ki 35 ngut ki samla kiba la pass bha ha ka SSLC bad HSSLC jong u snem 2022 ha phyllaw iing skul jong ka skul Christian Higher Secondary School Nongpoh.
Ha katei ka sngi la wan ban shim bynta da u Bah Luistar Lyngdoh President ka FKJGP North Khasi Hills District kum u kongsan, u Bah Liander Nongshli kum u symbud kongsan, ha ka jing don ryngkat u Rangbah Shnong ka shnong Pahamsyiem u Bah Jedwin Lyngdoh, u Assistant Rangbah Shnong u Bah Wanphrang Sumer, u Bah Nelson Sohkhlet Principal ka Christian Higher Secondary School, ki kmie ki kpa lem bad ki samla pule kiba la shah pynkup burom ha katei ka sngi.
Ha katei ka juh ka sngi naka liang u Bah Luistar Lyngdoh u lah ioh ban plie ruh ïa ka Pahamsyiem Winter Fest 2022-23 ba la pynïaid da ka seng Samla Shnong Pahamsyiem.
Haba kren ha katei ka sngi naka liang u Bah Luistar Lyngdoh kum u kongsan u la ai mynsiem ïaki samla pule ba kin dang bteng ban minot haki jingpule jong ki kumba kila lah ban leh bha mynta u snem, namar ka pule ka puthi ka long kaba kongsan tam ha kine ki sngi lada ki samla ki kwah ban poi sha ka thong kumba ki angnud haka jingim jong ki.
U la kyntu ruh ïaki ba kin long ki samla kiba tip ïaka akor ka burom kiba tip ruh ïa u Blei bad khamtam ban tieng burom ïaki bahalor jong ki, namar dei tang ki samla kiba tipsngi kiba minot bad kiba trei shitom kiba poi shaka thong bad kyrmen ba kitei ki samla kiba la ioh pdiang ïaka jingpynkup burom ha katei ka sngi ba kin dang lah ban lah bha shuh shuh haki jingpule ba kham shalor.
