7 tylli ki BOP bad ki PS yn buh ha ki Shnong khappud, mang 1.50 haduh 2 Klur tyngka

Shillong, Naiwieng 29: Ka jingïalang jong ka Kynhun Myntri kaba la long mynta ka sngi, ka la rai ban tei bad pynkhlaiñ ïa ki 7 tylli ki Border Out Post bad ki Police Station kiba don ha khappud bad ka Assam.
Napdeng kine ki 7 tylli, kan kynthup ruh ïa ka Shnong Mukroh bad Langpih. Kiwei kiwei pat ki long ka BOP ha Muriap, East Jaiñtia Hills, nangta ka Mukroh bad Tihwieh ha West Jaiñtia Hills. Ha Ri Bhoi District yn bun ha Rani, Jirang, ha West Khasi Hills yn buh ha Umwali bad Lejadubi bad Langpih. Kane ka kynhun Myntri ka la rai ban buh ruh ha Athiabari, nangta ban kyntiew kyrdan ïa ka Out Post sha ka Police Station ha Patharkhmah, Ri Bhoi District nangta ha Kyrshai kaba hap ha West Khasi Hills District. Ka kynhun Myntri ka la rai ruh ban buh ïa ka BOP ha Athiabari West Khasi Hills District.
U Myntri Rangbah u la ïathuh ruh ba ka kynhun Myntri ka la ïakren ruh halor ka jingdonkam ban buh ïa ki Ktem Pulit ha Ribhoi District khamtam sha ki jaka khappud bad ka Block II, ha kaba ka la don ka jingtyrwa halor kane. Hynrei na ka liang ka sorkar kan da wad bniah ïa ka jaka ha kaba la bthah ïa u DGP ban leit jurip ïa kane ka jaka da kaba shim lang ruh ka jingtip na ki paidbah katei ka thaiñ, khamtam eh ki paidbah ba shong ha ki shnong khappud bad ka Assam.
Haba ïakren bad ki nongthoh khubor hadien ba la wai ka jingïalang jong ka kynhun Myntri, u Conrad u la ong ba ka sorkar kan leh kyrkieh ïa kane, namar ba ladep mynjur ban mang pisa 1.50 Klur tyngka na ka bynta ki BOP bad 2 Klur tyngka na ka bynta ki Police Station. Napdeng kine kin don ki ïing kiba la don lypa satang ban shu pynbha bad pynheh beit bad kin don kiba yn dang shna thymmai.
Haba la kylli kaei ba ka sorkar Meghalaya kan leh lada don ka jingujor na ka liang jong ka Assam ban tei ïa kine ki Ktem Pulit, u Myntri Rangbah u la ong ba kine ki BOP bad Police Station ban buh kin dei beit ha ki jaka bym don kano kano ka jingïakajia bad ka Assam, hynrei kin dei beit hapoh u pud u sam ka Meghalaya. Hynrei lada don kano kano ka jingwohdong na ka liang jong ka Assam, yn sa ïakren.
Ha kajuh ka por u Conrad, u la ong ba kine ki Ktem Pulit kin dei kiba don bad ki Pullit pahara kiba biang ha kaba yn shim na ki Pulit kiba la don lypa bad lada donkam yn pynrungkam ruh yn leh ïa kata bad ki tiar ruh kin biang na ka bynta kine ki Ktem Pulit ban ai jingshngaiñ bad jingïada ïa ki paidbah ha khappud.