Shah kawang maw ka kali u kyrtong ka UDP na Jirang constituency ha Jorobat, lait salit na ka jingmynsaw

Nongpoh, Naiwieng 28: U kyrtong ka UDP na Jirang Constituency bad ki briew jong u, kiba ïa don lang ki la lait salit na ka jingmynsaw, kaba dei hadien ba ka Kali kaba ki shong ka la shah kawang maw ha ki runar na Assam kaba la jia ha Jorobat, ha khappud ka Meghalaya bad Assam.
Kane ka jingjia ka la jia ha ka janmiet Sngi Saitjaiñ ha ka por 9 baje janmiet, ha kaba u dang wan phai na ka Shnong Mawsmai ban ïa kynduh ïa ki briew, hynrei hadien ba la poi ha Jorobat pyrshah bad ka Police Outpost ka Assam kaba don ha Jorobat, uwei u maw u la wan her kynsan na ka Kali Assam bad u la pei lyngba na ka jingkhang ïit jong ka bynta ba shadien ka kali.
Kane ka Kali ka dei ka Kali Fortuner kaba don ïa u number ML 10 B 1471 bad ha kane ka jingjia ka la don ruh kawei ka Kali kamai na Meghalaya kaba don ïa u number ML 10 C 1864 ka la shah kawang maw ha ki briew kiba la suba kiba dei na Assam.
Na kane ka jingjia, u Bah Badhok Nongmalieh bad ar ngut ki nongbud jong u, ki la lait salit na ka jingmynsaw bad ka ïit ba hadien jong ka Kali ka la julor bad pait na kane ka jingshah kawang maw ha ki runar. Haba kren bad ki Nongthoh Khubor, u Bah Badhok Nongmalieh kum u kyrtong ka UDP na Jirang Constituency, u la pynrem jur ïa ki runar kiba la don kti ha kane ka kam kawang maw bad kane ka dei tang ka jingshim kabu na ka jingjia kaba la jia ha Mukroh ba 6 ngut ki mynsiem ba kordor ki la duh ei ïa la ka jingim.
Ban shngain ki paidbah ha ka leit ka wan bad nym mih shuh ki huri hura kiba dei hi tang ki kam pud ki kam sam, u Bah Badhok Nongmalieh u la kyrpad jur ïa ka sorkar Meghalaya bad sorkar Assam ki dei ban shim khia halor katei ka jingjia ha Mukroh bad ruh ban pynbeit noh kham kloi ïa ki kam pud ki kam sam, namar kum kine ki jingjia ka ktah ïa ka shongsuk shongsain ki paidbah bad ka leit ka wan kumba la sakhi ha kine ki sngi ba na ki huri hura ba la mih na Mukroh ka la ktah ïa ki paidbah ka jylla Meghalaya bad wat ka jylla Assam, u la bynrap.