Pynrem ka NHWU ba pynkulmar ki briew ba pyrta “ha ri lajong katba mon” ha Civil Hospital

Shillong, Naiwieng 26 : Ka Nazareth Hospital Workers Union (NHWU) ka seng jong ki nogtrei nongbylla ka Nazareth Hospital, Shillong ki pynrem jur ïa ka jingleh shongshit khlieh jong ki riew shim kabu kiba rung jubor da ka jingthmu ban bom ban tied pynmynsaw ïa ki briew kiba lui lui hapoh Civil Hospital , Shillong bad ban pynthut ïa ka jingtreikam ki nongtrei ka hospital da kaba pynhuri hura hapoh katei ka hospital ha ka 25.11.2022.
Ka tyllong khubor jong u Mawphor ka ïathuh ba kitei ki riew tap khmat ïalade haba ki rung hapoh katei ka hospital ki da pyrta ruh “ Ha ri lajong katba mon” bad beh thong ïa u pulit, bad ktah kti ruh ïa ki pulit kynthei kat haduh ba kin da mynsaw.
Shuh shuh na ka liang ka NHWU ka ong “ Ngi dei ban kynmaw ba ki nongtrei ka hospital ki dei kiba nyngkong ki ban ngat ha ka kam lada don kino kino ki jingkulmar bad jinghuri hura kiba kum kine. Ka jingpynhuri hura hapoh hospital ka long kaba ym lah ban pdiang satia bad ka seng hi ka pynrem jur ïa kane” ong ka kyrwoh na u bah Kenneth Swer President ka NHWU.
La ong shuh shuh “ Lada bandh ne curfew ki nongtrei hospital ki hap ban mih na la ki ïing ban ai ka jingshakri ïa ki paidbah baroh kiba donkam ïa ka jingsumar bad ka nuksa ka dei eh ha ka por ba don ka jingpang khlam COVID-19. Te kumta ka NHWU ka kyrpad ïa baroh ki nongshong shnong ka jylla ba to ngin ïakhih da ka jingstad bad jingshemphang ym da ka jingshongshit. Ngi donkam ban ïoh ïa ka jingdawa kaba hok ym da kaba pynmong pynmynsaw ïa ki para briew bad ki para nongshong shnong” pynkut ka kyrwoh.