Shillong, Naiwieng 26 : Ka North East Students Organization (NESO) ka la jied biang ïa u President barim ka KSU, u Bah Samuel B Jyrwa kum u Chairman jong ka ha ka General Council kaba long ha Khumulwng, Tripura naduh ka 24 haduh ka 26tarik Naiwieng.
Katei ka General Council ka la thung ruh ïa u Bah Daniel Khyriem, President barim ka KSU kum uwei na ki 6 ngut ki hynriewngut ki Coordinator.
Kiwei pat ki nongkitkam ba thymmai jong ka NESO na ka bynta ka samoi treikam jong u 2022-2025 ki kynthup ïa u Dr. Samujjal Bhattacharjya kum u chief advisor, Upendra Debbarma bad Sinam Prakash Singh kum ki advisor, Dipanka Kr Nath bad Ricky Lalbiakmawia -vice chairmen, Mutsikhoyo Yhobo kum u secretary general, Manseng A. Sangma bad Wangjam Sanatomba Meitei kum ki assistant secretary general, John Debbarma kum u finance secretary bad u Sanker Jyoti Baruah, Ejanthag Ngullie, Prikeshwar Moirangthem, Lalremruata Hlondo bad Bikash Debbarma kum ki coordinator.
Ha katei ka jingïalang ka NESO ka la shim ruh ïa ka rai ban ïakhun ïa ka jingrung kyrthlep ki mynder kaba dei ka mat kaba ma tam ïa ka jinglong tynrai ki jaidbynriew trai ri kane ka thain shatei lam-mihngi ka Ri nalor ka pule puthi, ka thungkam thungjam bad kiwei kiwei.
