Shillong, Naiwieng 26 : U nongïalam ka Congress u bah Ronnie V Lyngdoh ha ka Sngi Thohdieng ula kynnoh ba kane ka sorkar MDA ka la pyndem ha ka sorkar Assam bad ki bor jongka.
U la ong, ka MDA ka dei ban lehraiñ ban ïatrei lang bad ka BJP kaba ïalam ïa kata ka North East Development Alliance (NEDA) namar ym don satia kata ka roi ka par na kata ka NEDA hynrei ka dei pynban ban shu pyndem ha ka sorkar Assam bad ki bor jongka.
U la kynnoh ba u myntri rangbah um nud ban pynrem ïa ka jingshah siat iap ki hynriew ngut ki mynsiem briew ha Mukroh, klet shwa ïa kata ka ban kem lei lei ïa ki pulit ka Assam kiba donkti ban siat iap ïakine ki mynsiem briew.
U la ong “ Kadei ka kamram jongka sorkar ban ïada ïa ki paid nongshong shnong. Hato kane kam dei ka kamram jongka sorkar da kaba kan pynbun shuh shuh ïa ki Battalion jong ki pulit khnang ba yn lah ban pynkhlaiñ ïa ki bor pahara ha khappud. Ka dei ka kamram jongka sorkar ban ïada ym dei da ki paidbah ban ïada da lade ïa lade lym kumta balei ban donkam ban don sorkar. Lada ym don bun ki bor pulit kumta ka dei ka kamram jongka sorkar ban thung bun. Phi don ka pisa ban pynlut da ki klur klur tyngka haki tamasa balei phim pynlut ïa katei ka pisa ban pynbun pulit ban ïada ïa ki paid nongshong shnong ka jylla” ong u bah Ronnie.
Halor ka jingkynnoh ba ki san ngut kiba la shah siat iap ki dei kiba khaïi dieng sawdong tuh, u la ong “ Lada ki dei kita ki nongkhaïi dieng tuh,hato ka don ka aiñ ba kita ki briew jongka aiñ kin shu siat iap pathar beit ïaki. Hato ym don aiñ ban pynshitom ïa ki. Hato kane ka mut lada phi dei u riew runar yn shu pyniap beit kum u mrad? Hato ym don aiñ ban tehlakam ha ka jylla Assam? kane ka jylla ka dei kaba khlem ki aiñ? Ki pulit kin shu siat iap beit kat ia kiba don? Kim dei kita ki nongkhaïi dieng tuh, namar ym pat pynshisha hynrei la shu kynnoh hynrei wat lada pynshisha ruh ki don ki kyndon aiñ ban pynshitom ïaki ym ban shu siat iap beit ïa ki” ong u bah Ronnie.
U la kynnoh ba ki pulit Assam ki dei kiba la bna nam ban siat iap beit ïaki briew ha kyrteng ka fake encounter bad hadien kata kat ïa kiba ki siat iap kin kynnoh beit bad ki dei ki nongkhaïi beaiñ. Wat la ki dei kita ki nongkhaïi beaiñ ruh ka aiñ ka don ban pynshitom ïaki.
