Shillong, Naiwieng 26: Ka jingmih ka huri hura ha nongbah Shillong bad ha ki bynta ka rilum Khasi na ka daw ka jingshah siat ïap ki san ngut ki nongshong shnong ka Mukroh kaba ka don ka jingpynlong jingïakhih da ki kynhun seng bhalang bapher bapher la ïohi ba ka la ktah ym shuh tang ïa ka leit ka wan, ka ïew ka hat hynrei la lah ruh ban ïohi wat ha ki jaka sei pisa ne ki ATM kaba la pynkordit hi khait ïa ki paidbah namar kim lah satia ban sei pisa.
Ha ka jingleit jurip u Mawphor ha kylleng ki bynta ka nongbah Shillong la sakhi ba jan baroh ki ATM kiba don kim shym la don pisa satïa bad kim treikam.
Kane ka jingbym treikam kine ki jaka sei pisa ka la pynkordit hi khait ïa ki paidbah kiba thmu ban sei pisa.
Uwei na ki samla uba la ïa kynduh u la ong ba kane ka jingthut kane ka kor sei pisa ka pynjynjar shibun ïa u khamtam namar ba donkam pisa ha hospital.
“Kum ngi ba donkam pisa kyrkieh lada jia kumne ngin jynjar shibun eh ban siew da ki GPay, PhonePe ruh ka internet kam long ban sei na ATM ruh ym lah la long kumba ka pisa ba ngi kynshew ha bank kam dei ka pisa jong ngi wat la ka dei ka jong ngi,” u la ong.
Shuh shuh la ïohi ba ki don kiba thmu ban wan siew sha iew hynrei ki hap ban phai thylli namar kim don pisa ban leit siew leit tda.
“Ka pisa te ka jong ngi keiñ hynrei ynda la long kumne kam dei shuh phi ka jong ngi, namarkata kham suk kaba leh kum ka juk ba mynshuwa bahn buh beit ka pisa ha lade ym ban thep ha ki bank kumba kyntu ka sorkar,” pynpaw iwei i long kmie.
Kat kum ka jingwad jingtip kane ka jingbym long ka ATM ka daw hi ka dei namar ha ka sngi Thohdieng ka don ka jingkhot pep trei ki san seng ban pyni ba kim ai jingïatreilang bad ka sorkar namar ka jingjia ha Mukroh, ha ka sngi Saitjaiñ ruh ka dei ka sngi shuti bad kumjuh ha ka sngi Balang jong kane ka taiew ruh ka dei ka sngi shuti Seng Kut Snem.
