Nongpoh, Naiwieng 25: Tang hadien ka jingpynbna jong ka Assam Petroleum Mazdoor Union ban sangeh pynpoi umphñiang petrol shipor sha ka jylla namar ki jingïakhih bapher bapher bad sheptieng ioh jia kano kano ka jingjia ba sngewsih ha ka lynti ïaid jong ki, ki bor pulit jong ka jylla naduh ki pulit ka Ri-Bhoi mynta ka sngi kila leit ban synran bad pahara ïa kitei ki kali naduh Jorabat khnang ba kan nym don kano kano ka jingshah pyndik haka lynti ïaid jong ki haduh ba kin da poi sha ki jaaka ba kidei ban leit.
Kum ban shu pynpaw ba tang hadien ka jingpynbna jong katei ka Union ban sangeh pynpoi petrol shaka jylla kala don ruh ka khubor hamsaia kaba pur sted halor ka jingbym don petrol shuh habun ki jaka kaba la pynlamwir ïaki paidbah ban ïeng lain haki petrol pump ban ioh thep umphñiang kaba dei tang naka daw ka jingïakhih haka jylla naka jingshah siat iap jong 5 ngut ki paidbah ha Mukroh, ha kaba kila kren shai ruh ba kin bteng ban pynpoi petrol tad haduh ba ka sorkar jylla ka pynthikna ban pahara ïaki haka leit ka wan naka bynta ka jingshngaiñ jong ki nongñiah.
Hynrei dei mynta ka sngi ba kitei ki kali kila bteng ban ïaid biang ha surok ha kaba naka liang ki pulit ka jylla kila ap lypa naduh Joarabat ban synran ïaki haduh ka jaka ba kidei ban leit.
Haba kren sha ki lad pathai khubor naka liang u Sanchet Sureka Joint Secretary jong ka Petroleum Dealer Association u la pynpaw kadei ka jingrai sangeh pynpoi petrol jong ka Assam Petroleum Mazdoor Union shipor ka dei namar ba ka don ka jingïakhih haka jylla hynrei hadien bala ioh ka jingpynthikna naka sorkar jylla ba ki phah pulit ban pahara ha lynti ïaid naka liang jong ka Association kala sdang ban phah biang mynta ka sngi kumba 40 tylli ki trok kit umphñiang ban pynpoi sha Meghalaya ryngkat ka jingpahara ki pulit.
U la pynpaw ruh ka jingsngewnguh ïaki pulit kiba la kloi ban ïatreilang bad kyrmen ba kan nym don kano kano ka jingthud haka leit ka wan jong ki kali bad ha kaba ïadei bad ka jingjia ha Mukroh u la kyrpad ruh sha ka sorkar ba kan pynkloi ïaka jingïakren bad ka jingtohkit ban wanrah biang ka suk ka saiñ ba nym ktah ïaki paidbah ba bun balang.
