Ryngkat ka jingïamir jingmut pynkup burom ka KSU ïa ki ki samla kiba ïoh takma ha ki jingïalehkai

Mawkyrwat, ‘Naiwieng, 25: Ka Khasi Students’ Union (KSU) jong ka South West Khasi Hills District mynta ka sngi ka la ïoh ban pynlong ïa ka jingïalang ïathir jingmut halor ki jingeh jong ki samla ïalehkai ryngkat ka jingpynkup burom ïa ki 9 ngut ki nongïalehkai kiba napoh ka South West Khasi Hills District kiba la wanrah ka nam ka burom lyngba ka jingïoh jong ki ïa ki takma ha ki jait jingïalehkai bapher bapher.
Lah ban pynpaw ba kiba la shah pynkup burom ha kane ka sngi ki kynthup ïa kiba la ïoh takma ha ka North East Olympic Games, ha ka Indian Open Wako International Kickboxing Tournament, ha ka Cycling, ha ka Athletics, ha ka jingïalehkai kynjatbol ha kaba ki kyrteng ki long u Wolbertstar Ramsiej uba la ïoh takma rupa ha ka 10,000 meter bad takma rnong ha ka 5000 meter, ka Lyntijingkyrmen Kharjahrin kaba la ïoh takma rnong ha ka 3000 bad 5000 meter, u Marshall Pariong bad u Banpynkmen Lyngkhoi kiba la ïoh takma rnong ha ka jingïasiatkhnam jong ki shynrang.
Nangta, ka Andrica Nongsiej kaba ïoh takma rnong ha ka jingïasiat khnam jong ki kynthei, u Willbornson Wahlang uba la ïoh takma ksiar ha ka MTB Downhill Hardtail Men’s Race jong ki nongñiah cycle, u Dajied Wanshnong takma rupa ha ka jingïalehkai kynjatbol, ka Kyntimon Marweiñ ha ka takma rnong ha ka 10,000 bad 5000 meter bad u Lumjingsuk Iawphniaw takma rupa ha ka 2nd Indian Open Wako International Kickboxing Tournament.
Ha shwa ban ïaid shaphrang ïa la jingïalang, na ka liang ki nongleit ïashimbynta ha ki jait jingïalehkai bapher bapher bad kumjuh ruh na ki kmie ki kpa ki la pynpaw ïa la ki jong ki jinglap jingshem jong ki haba ki leit ïashimbynta bad ka jingphah jong ki ïa ki khun namar bunsien ha ka jingleit jong ki ki la hap ban pynlut hi na ka ka plang lajong tang namar ba ka sorkar kam shym la peit ne ai jingïarap. “Ha ka jingñiah cycle lei lei ngi dang ñiah ïa ki cycle kiba tat dor haba ïa nujor bad kiwei de ki para nongñiah na kiwei de ki jaka namar ïa ki ka sorkar ka ai ki lad jingïarap”, ong uwei na ki samla. Kumta ki la buh ka jingkyrpad ïa ki Sengbhalang ba kin ïarap lem da kano ka lad kin pynïoh khnang ba ki nongïalehkai jong ka dong ka thaiñ kin ïoh ka lad ban long lem kum kiwei de.
U bah Forwardman Nongrem, President ka KSU South West Khasi Hills District, haba kren ha ka jingïalang u la ong ba kane ka sngi ka dei ka sngi ban ïamir jingmut kumno ban sngewthuh ïa kita ki jingeh bad ban ïathir ruh da kano ka lynti yn lah ban weng ïa kita khnang ba kum ki nongïalehkai kin lah ban kiew na kawei ka por sha kawei pat. U la ong ruh ba ha manla ki khep la ju ïohi ba ki samla nongïalehkai na ka dong ka thaiñ ki la hap ban leit ba uwei u briew sha uwei pat ban leit pan jingïarap bad khamtam eh ki don kiba wan mih sha ki nongïalam jong ka seng ba kin ïarap lem da kino kino ki lad tang ban ïoh ka lad ban leit ïa shimbynta ha ki jingïalehkai.
“Ngi don eh ka mynsiem ban ïarap, hynrei katno eh ngin lah namar ka jingdonkam jong ki kam long tang da ki hajar hynrei bun ka poi da ki phew hajar bad da ki lak ruh”, ong u bah Nongrem. Namarkata, kum ki nongïalam jong ka seng kiba sngewthuh ïa ki jingeh jong ki bad ki kwah ruh ban thaw ki lad ki lynti ban weng ïa kita ki jingeh khnang ba ki samla kin lah ban leit ïa shimbynta ha kata ka bynta ba ki ki don. Shuh shuh u la ïathuh ba kum ki nongïalehkai ki dei ban wad jingtip na ka District Sports Promotion Society (DSPS) kaba dei kawei na ki association ka ban lah ban ai ki lad jingïarap lyngba ka scholarship na ka bynta ki samla kiba don ka sap ha ki jingïalehkai khnang ba kin nym lut than eh na ka lade hynrei ba ka sorkar ruh kan peit lem ha ka lut ka sap.
U bah Nongrem u la ong ruh ba hadien ka jingïoh sngew lyngba ka jingïathuh jong ki samla ba ki shem jingeh, u la pynpaw ruh ba ka long kaei kaei kaba pyndiaw mynsiem na ka bynta jong ki namar na ka shyntur jong ki nongmihkhmat hi ki mih ka kyntien kaba pynnoh mynsiem ïa ki samla ïalehkai. Namarkata, kum ka KSU ka don ban ai mynsiem ba kum ka seng kan don ryngkat lem bad ki, ym da kaba kin lah ban kyrshan da ka pisa hynrei da kaba kin ïai don ha syndah bad ki ban pynsngew lem ïa kita ki jingeh shakor jong sorkar.
Kiwei pat kiba ïadonlang bad kiba la shim ruh ka bynta ban ai mynsiem ki long naduh u Jiedskhem Nongsiej, General Secretary ka KSU South West Khasi Hills District, u bah J.F. Iawphniaw, Vice President ka FKJGP South West Khasi Hills District, bad u bah Pauldeep Tongwah, President ka KSU Mawkyrwat Circle.
Ha kane ka sngi la ïadonlang ruh ki dkhot jong ki ar tylli ki Sengbhalang, ki samla kiba ïoh pdiang ïa ka jingshah pynkup burom bad kumjuh ruh ki kmie ki kpa jong kiba wan pdiang ïa ka jingshah pynkup burom bad ïa ka jingïalang la pynlong hapoh ka Women’s Hostel jong ka Sngap Syiem College, Mawkyrwat.