Shillong, Naiwieng 25 : Hadien ka jingap khmih lynti kaba la slem, ka Meghalaya Cricket Association kan ïoh ban pynlong ha ka sien kaba nyngkong eh ïa ka lympung ïalehkai kriket ba pynïaid da ka BCCI naduh ka samoi 2019-20 hapdeng ka Meghalaya bad Karnataka ha ka lympung ïalehkai U-19 Cooch Behar Trophy kaban sa pynïalehkai ha madan kriket jong ka MCA lashai ka sngi Saitjaiñ.
Kumba ïa ka madan tied bol dang shen u nongpeit nongkhmih ha ka jingtei ïa ki stadium jong ka BCCI u la ong ba ka madan ïalehkai kriket ha Polo kadei kawei na kiba paka tam hapoh ka ri India. Ka madan ïalehkai kriket jong ka MCA ka la kylla duh naduh ka samoi 2019-20, ha kaba ïa ka madan tied bol la pynthymmai, ka jingbuh da ki phlang ba thymmai, ka kamra khreh kaba la shna kyrpang bad kiwei kiwei ki jingdonkam.
Katei ka jingïalehkai pyrshah ïa ki kynhun ba khlaiñ bor kum ka Karnataka kan ai jinghikai shibun ïa ki rangïalehkai dang khie ka jylla na ki player kiba la tbit ha ka jingïalehkai. Ka jingïalehkai kan sdang ha ka por 8:30 baje mynstep bad ka MCA ka la pynbiang ki jaka shong na bynta ki paidbah nongwan peitkai.
Kane ka jingïalehkai kan ïarap ruh na bynta ka Association ban pynkhreh biang sa shisien na bynta ban pdiang pynlong ïa ka Ranji Trophy, ïa kaba lai tylli ki jingïalehkai yn pynlong ha Nongbah Shillong kaban sdang ha u bnai Nohprah.
