Kdiah u shyieng tyngam, kad ka shyntur ki arngut ki lanot ba shah siat kuli ha ki Pulit Assam

Shillong, Naiwieng, 24: Ar ngut ki lanot kiba kynthup ïa u Ma Elias Shamayang bad u Ma Sheini Nartiang kiba la mynsaw jur na ka jingksam jong ki kuli na ki ktang suloi jong ki Pulit ka jylla Assam ha ka shnong Mukroh, West Jaiñtia Hills District ha ka step 22 tarik mynta u bnai ki dang don mynta hapdeng ka jingshah sumar ha NEIGRIHMS Hospital, Shillong. San ngut ki nongshong shnong jong ka shnong Mukroh kiba la duhei ïa la ka jingim ha kane ka jingjia ki kynthup ïa u Thar Shadap, u Si Dhar, u Six Talang bad uwei u nongtrei ka Forest ka Sorkar Assam. Katba u Tang Nartiang u la khladnoh ha Barato PHC bad u Chirup Sumer u la khladnoh ha Woodland WK Hospital, Sabahmuswang.
Ka KSU hapoh ka jingïalam jong u General Secretary u Samla Donald V. Thabah ki la leit jngoh ïa kine ki arngut ki lanot ha NEIGRIHMS Hospital bad kular ban pynsngew sha ki tyndong skhor ka Sorkar ba kan bei ïa ka jinglut jingsep na ka bynta kine ki arngut ki lanot katba ki dang don hapdeng ka jingshah sumar.
“Ha ka jingleit jngoh ïa kine ki arngut ngi ïohi ïa ka jingkad ka shyntur bad ka jingkdiah u shyieng tyngam na ka jingksam ki kuli,” la ïathuh u General Secretary ka KSU.
Katkum ka jingong jong u Samla Thabah, u la ong ba kum ka seng kan ïai don ryngkat bad kine ki paradoh parasnam haduh kaba kut. “Lada kine ki arngut ki ïoh jingmynjur na ki doktor ka NEIGRIHMS ban leit sumar shabar ka jylla ka Sorkar ka dei ban pynstet mardor ban pynbiang lut ïa ki jingdonkam nadong shadong,” ong u Samla Thabah.
Hadien kane, ka HYC hapoh ka jingïalam jong u Vice President u Bah Donboklang Kharlyngdoh ki la leit jngoh ïa kine ki arngut ki lanot kiba dang shah sumar ha NEIGRIHMS Hospital.
U Bah Sarlangki Dkhar, uwei na ki bahaing jong kine ki arngut kiba shah sumar ha NEIGRIHMS Hospital ha ka jingïakren bad ki lad pathai khubor u la pynpaw ka jingsngewsih ïa ka jingbym shimkhia jong ka Sorkar ban pynbiang ïa ki lad jingsumar.
“Ka jingleh jong ka Sorkar Jylla ka pynpaw kumba kam don mynsiem sngewlem ïa kine ki arngut kiba shitom jur hapdeng ka jingsajia. Ka (Sorkar) ka don tang ïa ka mynsiem tep eitmiaw ïa ka jingjia watla ki san ngut ki mynsiem briew ki la duhei ïa la ka jingim,” ong une u samla.
“Kum ki nongshong shnong bad ka ing ka sem ngim sngew thikna ïa kane namarba ka Sorkar ka shu kular tang da ka ktien hynrei kam ai da ka jingthoh. Ka jingïarap ba la ai sha ki bahaing jong kiba la khladnoh ka shu long tang dep rukom khnang ba ki bahaing kin ong ba la ïarap ïa ngi. Donkam ban ai kham bun ka jingïarap ïa kiba mynsaw kiba dang don mynta hapdeng ka jingsuh jingthar bad ka jingkhuslai kaba ki hap ban mad bad ban phah sumar,” u la bynrap.
U la ong ruh ba haduh mynta ym pat don wat tang uwei ruh u Ophisar Sorkar u ban wan mih sha ing ban kular ai jingïarap na ka Sorkar bad ban phah sumar ïa kiba mynsaw.
Haba ïathuh ïa ka jingshem lanot jong ki paidbah ka shnong Mukroh bad Barato ha ki nongtrei ka Beat Forest ka Sorkar Assam bad ha ki Pulit Assam kiba ju pyndik laiphew jait, u Bah Sarlangki Dkhar, u la ong, ‘ngi dap da ka jingsngewkhia kaba khraw haduh katta katta namarba naduh ki snem ba nga dang rit, nga mad ïa kine ki jingjia. Nga ïaalde nga don ki jaka rep sha Mukroh. Ha kiba bun ki bynta ngi mad jingeh. Ngi la ju pynsngew ïa ki jingeh sha ka Sorkar hynrei ki kheiñ pynban ba ki briew kiba sah ha khappud ki dei kiba shu thok ba shukor.”
“Ngi kiba sah ha khapud jong ka shnong Mukorh ngi mad jingeh haduh katta katta haba ngi leit thoh dieng ban thang ruh ngi shah kem, ban rah ïa ki wait ki Pulit ki knieh bad nalor kata ki pyndik ïa ki jingri jong ngi da kaba pharep laitphew jait. Baroh katta katta ngi la ïaishah bad ngi shu pyntip sha u Border Magistrate,” u la ong.
U la ïathuh ba ka jingmih jong ki paidbah ha ka step 22 tarik, Naiwieng, 2022 ka dei na ka jingsat mynsiem ïa ka jingshah pyndik ba laiphew jait ha ki nongtrei Beat Forest ka Sorkar Assam. “Ha kato ka step da ka jingsat mynsiem, ki paidbah ki la mih ban dawa pyllait ïa ki lai ngut kiba la shah rah shimiet shimiet ha ki Pulit Assam khlem da pyntip ïa u Sordar Shnong, ïa ki Pulit ka Meghalaya bad ïa ka iing ka sem. Kane ka paw ba ka dei ka jingrahbor,” la kynthoh u Bah Sarlangki.
“Ngi leit sha kato ka jaka ban dawa pyllait ïa ki lai ngut kiba la shah bat, hynrei ki Pulit Assam kim sngap satia bad ki don ka jingthmu shalyndet ban leh beiñ bad leh katba ki mon,” la kynnoh u Bah Sarlangki.
“Kum ki nongshong shnong bad ki paramarjan shnong ngi kyrshan bad kyrpad ïa ki paradoh parasnam ban kyrshan lem ïa ngi ban ngin dup lah ban ïakhun ïa la ka jong ka hok. Ngi don ïa ki rekod ban pynshisha ïa ka jinglong trai ïa ki jaka ki puta. Hynrei ka Jaiñtia Hills Autonomous District Council (JHADC) naduh ba la jia haduh mynta kam shym la kren eiei lane wat ban leit (sha Mukroh) ban kdew ïa ki jaka kiba dei hok ki jong ngi,” la ïathuh u Bah Sarlangki.
“Haduh kato ka sngi, ki Pulit Assam ki wan ïaid baheh shaduh Mukroh nalor ba ki tip shai ba ka dei ka jaka kaba dang hap ha Meghalaya bad ki tip ba ki briew na Meghlaya ki wan rep sha Mukroh. Ki (Pulit Assam) ong ba kim salia bad ong lada don uno uno uba pynthud ki wan kem beit mynsngi mynshai bad mynmiet ruh. Kane ka pynpaw shai ba ka Sorkar assam ka aibor tylli ha ki Pulit katba ka Sorkar Meghlaya kam patiaw bad kam kheiñ snep satia ïa ngi kiba sah ha khappud,” ong u Bah Sarlangki.
“Nga pynrem ïa ka jingwan ki Myntri Sorkar ha Mukroh bad ka jingwan jong ki ka pyni ba ki long kum ki kuratia kiba jaw ummat tang ha kato ka por bad lada ki sngewkhia ïa ka jingeh ha khappud ki la dei ban wanrah da ka polisi bad ki dulir khnang ba ngin shngaiñ ban shong ban sah da kaba kdew ba kato ka jaka ka dang hap hapoh u pud u sam ka Meghalaya,” ong shuh shuh u Bah Sarlangki.
U la ong shuh shuh lada ka Sorkar ka dang hap ban ïapynbeit ïa baroh kiba don ka syrnot bad u Sordar uba la ïoh syrnot na ka JHADC ka mut ba kim don iktiar. Kata ka dei ka jingkylli ba ka JHADC bad ka Sorkar kin hap ban ai jubab.