Hadien 300 tylli ki shithi, khatduh shah ka sorkar pdeng ban shna park bad madan ha Jhalupara

Shillong, Naiwieng 20 : Ka shim por haduh kumba 50 snem ei ei ba ka shnong Jhalupara khatduh kan ïohi ba ka park ïalehkai na bynta ki heprit, ka jaka shongkai pyngad na bynta kiba la san bad khamtam eh ka jaka ïalehkai na bynta ki heprit kan don ha ka shnong jong ki.
Katkum ka jingïathuh da ki nongïalam shnong, ka daw tynrai kaba pynslem ïa ki ban ïoh ïa kitei ki jaka shongkai bad ïalehkai kadei namar ba ki hap ban ïoh shwa ïa ka jingbit na ka sorkar pdeng shwa ban shna ïa kino kino ki kam pynroi ha kitei ki jaka kiba tip kum ki jaka Cantonment ne jaka shipai.
“Dei lyngba ka jingshimkhia jong u MLA ka thaiñ Bah Sanbor Shullai ba dei ruh u Myntri Sorkar ka jylla ba khatduh ngi la ïoh ïa ka jingbit ban shna ïa kine ki kam pynroi ha ka shnong,” ong u Bipin Pradhan ba dei ruh u General Secretary ka Shillong Cantonment Development Council haba kren ha ka jingplie paidbah da u Bah Sanbor hi ïa kitei ki projek ba la dep pyntrei ha katei ka shnong.
Nalorkata, u ïathuh ruh ba u Bah Sanbor u la pynher ym duna shuh 300 tylli ki shithi sha ka sorkar pdeng bad u la leit ruh ban kynduh ym duna ïa ka 12 sien ïa ki Myntri ka sorkar pdeng na ka bynta ban ïoh jingbit ban shna ïa kitei ki kam pynroi ha katei ka jaka.
Katto katne ki jaka ba la plie paidbah ha katei ka sngi ki kynthup ïa ka Iing shnong bad ruh ka jaka shet ba la tei lyngba ka skim SUWP, nangta ka park na bynta ki heprit lyngba ka skim AMRUT jong ka sorkar pdeng bad ruh madan phutbol rit bad kumjuh ka jaka ïalehkai badminton bad tennis.
U la ïathuh ruh ba namar ka thain kadei kaba kyrduh um kumta na ka liang u MLA u la pynkhreh ban don noh da ka jaka pynlang um kaba 14 klur ha Jhalupara, nangta 15 klur na ka bynta ban pynbha ïa ka Shillong Cantonment School, 7 klur na bynta ban pynbha ïa ka madan Cantonment hapoh ka Khelo India Khelo.
Na ka liang u Bah Sanbor u la ïathuh ba ka jingsngap jong ka sorkar pdeng ïa ka jingkyrpad jong u kum u MLA bad ruh kum u nongïalam ka BJP na Meghalaya kadei namar ki kwah ba ki heprit kin ïoh ïa ka lad ban pynkhih met ha ki kam ïalehkai bad ruh ban lait na ki jingmlien ba sniew.
“Ka Jhalupara kadei ka jaka ba la khapngiah bha bad kaba eh bha ban ïoh jingbit ruh na ka sorkar pdeng na ki shipai hynrei da ka jingïarap ki nongïalam BJP na Delhi, ki la bthah ba dei ban ai ïa ka NOC na ka bynta ka jingmyntoi jong ki heprit kane ka thaiñ bad khamtam eh na ka bynta kito kiba la noh met ba kin ïoh ban leh yoga ha ka por mynstep.
U ong ruh ba u sngewkmen haduh katta katta ban ïohi ba ki nongïalam shnong haduh ki paidbah ki mih ryntih ban leh kmen lang ban sakhi ba ka jaka kaba lang beit da ki jaboh baroh shi katta mynta ka la kylla long ka jaka ïalehkai pyngad.
Katkum ka jingïathuh jong u, kitei ki projek baroh kiba la shna ha katei ka jaka ka la poi sha ka 60 lak tyngka baroh.
La donlang ruh ha kane ka sngi naduh u President ka BJP Bah Ernest Mawrie nangta u MDC barim ka Laban Mawprem Bah Ricky Shullai nalor kiwei kiwei ki rangbah na ka Lease Holder Association nangta na ka Jhalupara Village Council bad ruh na ka SCDC.