Wat la dei ka sngi u Blei shlei miar ki nongwan peitkai ïa ki nongrwai ha SICPA

Shillong, Naiwieng 20: Wat la ka sngi kaba ki arngut ki nongrwai bad nongtem; kata u Jay Sean uba dei u nongrwai bad u Edward Maya uba dei u Disc Jockey (DJ) ki wan ha Shillong wat la ka dei ha ka sngi u Blei hynrei la sakhi ba ki nongwan peitkai ki shlei miar bad pyndap ruh ïa ka phyllaw ka Shillong International Centre for Performing Arts (SICPA), Mawkasiang, New Shillong.
U Kamaljit Singh Jhooti ne u Jay Sean uba ki ju tip uba dei u nong London mynta uba don ka jinglong tynrai na Punjab India, u la lah ban kring da ki palat 7000 ngut antad ki briew sha ka jingwan rwai jong u ha Shillong bad ha kane ka jingrwai jong u la sakhi ba ki nongwan peit kai kim lah khlem da shim bynta lang da kaba rwai bad shad ha ka jingrwai ba pynkyndeh mynsiem une u Kaitor ha Shillong.
Haba u kren sha ki paidbah nongrwai u Jay Sean u la ong ba ka jingdon jong u kum u nongrwai ba don ka jinglong tynrai ne ka orgin na India ka la long ka jingkhyllew ïa ka ri namar kat shaba u leit u rah ïa ka khubor ka India bad ka jingriewspah jong ka.
“Kat shaba nga leit ka jinglong brown ka sniehdoh jong nga ka neh bad nga bad kane ka dei namar nga dei uba don ka jinglong tynrai na kane ka ri ba ieid eh” u la ong bad bynrap, “ha kine ki sngi ban wan ngan leit sha Australia bad ngan rah khubor shphang ka Shillong bad ka jingieid jong phi ki nong Shillong ïa ka tem ka put bad ka rwai ka siaw hi.”
Ha kane ka sngi u Disc Jockey (DJ) ba bna nam ka pyrthei uba na ka ri Romania u Eduard Marian Ilie ne u Edward Maya ba ki ju tip u la lah wan ban tem ha kaba ki paidbah nongwan peitkai kim lah khlem da pynkhih ïa ki kti ki kjat namar ka ingtbit jong u ban tem ka jingtem na ki kti ba tbit bad jem ïa ka Disc.
Ha kane ka sngi ki nongshad nongrwai na ka jylla ruh ki la ïoh bynta ban pyni ïa ka sap jong ki ba kynthup kum u Samla Bajop Kupar Nongbri bad kiwei de.
La sakhi ruh ba ym tang kiba na kane ka jylla hynrei wat na kiwei ki jylla ka thaiñ lam Mihngi ruh ki la wan shim bynta sha kane ka lymnpung ka rwai ka siaw ba la pynlong da ka jingbei tyngka ka sorkar jylla ryngkat ka Royal Stag.
Kat kum ka jingïathuh ki nongpynïaid la ong ba ka jingwan ki paidbah ka dei namar ki nong Shillong hi ki dei kiba ieid haduh katta katta ïa ka rwai ka siaw bad ka tem ka put kaba la ju ïoh nam ruh kum ka “Rock Capital of India”
Malu mala la ïathuh ba ki tiket kaba ki lah ban die kam duna ïa ka 5,000 tylli eiei tad haduh ba thoh ïa kane ka khubor bad ka dor ka tiket ba tad tam ka long 1,000 tyngka.