U Dr Mukul u lah ban phet na ka TMC bad pynïasoh sha kiwei ki party namar ka shuki : Dr Kharlukhi

Shillong, Naiwieng 20 : U President ka NPP, Dr. WR Kharlukhi ha ka sngi Saitjaiñ u la ong ba lada u Dr. Mukul Sangma Nongïalam ka Liang Pyrshah, Dr. Mukul Sangma ryngkat ka kynhun ki lah ban mih noh na ka TMC ruh thik kumba ki mih na ka Congress ban leit pynïasoh noh sha kawei pat ka party namar ka shuki.
Haba kren bad ki lad pathai khubor, u Dr. Kharlukhi u la pynkynmaw ruh ba kumno ka Congress kaba don 20 ngut ki MLA ha u 2018 ka la kad arliang noh hadien ba 12 ngut na ki MLA ki la leit ban pynïasoh noh sha ka Trinamool Congress.
Ha kajuh ka por, utei u heh NPP u la ong, “Mano ba lah ban tip ba lada ki phet na ka Congress kumto haba wan mano mano ha ka bor ki lah ban phet noh (na ka TMC) ruh. Ïa kane ruh ngam lah satia ban ong.”
Haba pynshai pat halor ka jingkynthoh jong u Dr. Mukul ba ka sorbe jong ka NPP ka la kdew ba kan jop tang 5 – 6 seat, na ka liang u Dr. Kharlukhi u la ong ba lada katei ka sorbe la leh da ka NPP kumba la kamda u Dr. Mukul kamut ba um dei shuh u TMC hynrei u la dei u NPP lym kumta kumno un tip.
“Kumta, kim pat mad satia ïa ka elekshon ha rilum Garo na ka tiket TMC kumta nga khmih lynti ba un lah ban kheiñ jingkheiñ bha lym kumta u lah ban shah rem ei ruh ïalade,” ong u Dr. Kharlukhi.