Shilong, Naiwieng 15: Ka surok ka dei u budlum ka ïoh ka kot jong kano kano ka shnong bad ka thaiñ hynrei ka jingdon ka surok ba la tih ha ka shnong Mawlai ban thep ïa ki pipe um ka la long pynban ka jingkordit bad ka jingpynduh ja ïa ki nong Mawlai kiba buh dukan ha shilynter ka surok na Mawlai Petrol pump haduh FCI na ka daw ka jingpumpum ba mih na katei ka surok.
Ha ka jingleit hiar u Mawphor sha kitei ki jaka la sakhi ba kiba bun ki nongbuh dukan ki la hap ban ker da ki plastik ban da na ka jingrung ka pumpum sha ka dukan jong ki.
La ïohi ruh ba kiba bun ki khynnah skul kiba ïaid lyngba katei ka jaka ki la hap ban kah khmut bad ban deng ïa ki jingda khmut na ka daw ka jingpumpum jong katei ka surok.
Haba ïakren bad ki katto kate ki nongbuh dukan ki la ïathuh ba wat ka die ka thied ka hiar shaba palat na ka daw ka jingsngew salia ki paidbah ban wan thied namar ki mar ki mata ki sop pumpum lut bad ba ki paidbah ruh ki kiar na kaba mih sha surok ban wan thied hynri ki leit noh sha kiwei ki iew bad ki dukan bym hap ban bam pumpum ki la ïathuh.
Ki la ïathuh ruh ba bunsien shuwa ban pumpum kane ka surok ki mar kiba ki ju lah ban die kumba 10 kilo shi sngi naduh ba la wan ka aiom rkhiang bad ba ka surok ka pumpum wat tang marshiteng ruh kim lah die shuh.
“Pyrkhat maphi wat ki nongthied kiba mut thied jhur ki phet noh ban ïohi ba ki jhur ba ngi buh ha dukan ki bit pumpum. Ngi ruh ban sait shaei ngin lah bor ban sait man ka kynta,” ong kawei ka longkmie ba buh dukan jhur ha Mawlai Stand Bos.
“Ha ka por ba jur u slap ki paidbah ki mad jingjynjar na ka jingktieh ka surok bad ka jingsyntuid jong ka ynda la rang ka bneng pat sa kane ka jingpumpum,” bynrap uwei uba buh dukan die jaiñ ha katei ka jaka.
Haba la kylli kane ka jingtih ka surok ka dei naduh mynno kine ki nongshong dukan ki ïathuh ba ka la jan kynjoh sha ka arsnem.
Uwei u rangbah uba buh dukan u la ong “Kat kum ka jingtip ba ngi la ïoh u contractor uba pyntrei ïa kane ka surok u dei u nongïalam ba hakhmat jong u MDC ka Mawlai u Bah Teibor Pathaw ngim tip la ka jingpbym pyndep ka dei na ka jingïynibor ki nongmih khmat ne kiei ki daw” bad bynrap, “lada ka dei ka jingpynibor hapdeng u MLA bad MDC ka dei shisha ka jingong ïadur ki hati ïap ma ngi ki rit ki ria”.
“Lada phi peit sha kiwei ki shnong bad ki kyntoit ka sor Shillong kum sha Jaïaw bad Motphran ïa kato ka jaka ba ki tih ban thep ïa ki pipe um wat shitaieng ruh kim bampor ban siang bha bad maramot biang ym kum shane tip ïoh ki kwah pynban ban pynsyllang ïa ngi ruh” ong uwei u rangbah.
Shuh shuh ki nongbuh dukan ha Stand Bus ki la ong ba ki la lum synñiang pisa para ma ki ban thied um na bynta ban synreit ïa katei ka surok namar lada ym leh kumto yn ym long shuh wat ban plie dukan namar ka jingjur sha ba palat pud ka jingpumpum.
“Pyrkhat ngi kiba buh dukan barit baria ngin hap pynmih 50 tyngka ban thied um ban synreit ïa kane ka jaka lada ym leh kumta ruh ym long ngin ïap thngan syndon ngi kiba la im ja na ka jingbuh dukan harud kane ka surok,” ki la pynpaw.
“Tang kawei ngi kwah ban kyntu ïa uta u Contractor ba um dei ban pynsyllang ïa ngi bad kumjuh ïa ki nongmih khmat ba kin sngewbha ban peit lem ïa kane ka jingeh jong ngi,” ki la bynrap.
