Shlei u Lum Tyngkong da ki phew hajar ngut ki riewngeit Catholic ha ka Proseshon ïukharist

Shillong, Naiwieng, 13: Da ki lak ngut ki riewngeit Catholic na ki 35 tylli ki Parish kiba hap hapoh ka jylli jong ka Jyllaniam Bah Shillong bad kynthup ruh ki riewngeit na ki Parish kiba hap hapoh ka jylli jong ka Jyllaniam Nongstoiñ bad Jyllaniam Jowai ki la pyndap smam ïa u Lum Tyngkong ha Laitumkhrah ban ïashim bynta da ka jingriewblei ha ka Proseshon Ïukharist.
Ïa ka Proseshon Ïukharist la lah ban pynlong biang mynta u snem 2022 hadien ar snem na ka jingwan lynshop jong ka khlam jingpang Covid ha u snem 2019 bad 2020.
Ha ka jingïaid proseshon ha ka shnong Laitumkhrah kaba la neh kumba lai kynta tam eiei la sakhi ïa ka jingïashim bynta da ka jingriewblei jong ki paidriewngeit bad ki riewniam ban ïaroh bad ban pyndonburom ïa u Blei da ki jingrwai bashoh mynsiem ha ka Ïukharist Bakhuid.
Ha ka por mynstep la pynmynta ïa ka jingkñia Mass Bakhuid da u Archbishop ka Jyllaniam Bah Shillong u Most Rev. Victor Lyngdoh ryngkat ka jingsynran lang jong u Vicar General u Rev. Fr. Richard M. Majaw bad kiwei kiwei de ki Lyngdoh Sohblei.
U Arcbishop Victor Lyngdoh haba pharia ïa ka Ktien u Blei, u la pynkynmaw ïa ka dulir Lumen Gentium 11 jong ka Vatican kaba kdew ïa ka tyllong bad ka thymmei namarba ïa ka Balang Catholic la kha na ka jingmaïa Paskha, ka jingim, ka jingshah shitom, ka jingïap bad ka jingmih pat jong u Jisu Khrist.
Da kaba pynsngewthuh shuh shuh ïa ka jingmut bajylliew jong ka Ïukharist Bakhuid, u Archbishop Victor Lyngdoh u la ong, “ïa ka jingmaïa Paskha la pynmynta biang ha ka Ïukharist Bakhuid ïa kaba ym dei ba ngin shu kynmaw hynrei ka urlong biang da shisha ba u Jisu Khrist u im, u la shah shitom, u la shah ïap bad u la mihpat. U la knia ïalade ban pynim ïa ngi baroh. Na kata ka daw, ka shithi u Paulus sha ki Hebru 9:12.14 ka kren shai ba ym dei shuh da ka snam jong ki mrad ban sait ïa ki pop jong ngi hynrei u Jisu Khrist hi dalade u la shim ïa ka jaka u langknia ban phlei ïa la ka jong ka snam na ka bynta ban said khuid ïa ki pop jong ngi baroh. Kane baroh ka dei ka jingieid jong u Blei ïa ngi bad ba ka jingïadei jong ngi bad u Blei kan long kaba janai manla ka khyllipmat.”
Haba pynshai shuh shuh ïa ka jingmaïa ba jylliew jong ka Ïukharist Bakhuid, u Archbishop Victor Lyngdoh u la pynkynmaw ïa ka Shithi Sharai jong u Pope Benedict XVI halor ka Ïukharist Bakhuid kaba ong, “ka Ïukharist ka dei ka jingmaïa kaba ngi dei ban ngeit. Ka Sakramen ka pynskhem ïa ka jingieid ba khrawtam kaba ïalam ïa u Jisu ban aiti ïa la ka jingim na ka bynta jong ngi. Ka Ïukharist Nakhuid ka dei ka jingmaïa kaba ngi dei ban leh niam. Ka Balang ka ïa bteng ïa ka jingknia Ïukharist lyngba ki Lyngdoh ban pynmynta ïa ka jingknia Mass kaba u Jisu hi u la seng la buh ïa ki Lyngdoh. Ka don ka jingïadei kaba kyrpang hapdeng ki Lyngdoh bad ka Ïukharist bakhuid bad khlem ki Lyngdoh yn ym don Iukharis, khlem ka Ïukharist ngin ym lah ban im. Namarkata ki Lyngdoh ki pynlong borabor ïa ka jingknia Mass Bakhuid. Ka dei ka jingjia ha kaba u Jisu u la shah shitom u la shah ïap bad u la mihpat. Da ka jingshah shitom, ka jingshah ïap, ka jingmihpat bad ka jingkiew sha bneng u Jisu u la pynpura ïa ka Paskha kaba la pyllaitluid ïa ngi na ka jinglong mraw ban ïaid pilkrim sha ka jingim bymjukut.”
Shuh shuh u la ong, “ngi dei ban ïa ka jingim kaba shah ïalam ha u Mynsiem Bakhuid. Lada ngi im katkum ka jingïalam jong u Mynsiem Bakhuid ngin ïoh lait im bad lada ngi im katkum ka doh ngin ïap. Namarkata, ka Ïukharist Bakhuid ka dei ban ktah ïa ka jingim jong ngi baroh kawei.”
“Ngi ruh ruh ban im katkum ka sngi jong U Trai. Ka jingim kaba manla ka sngi kam dei ban long markhongpong. Ngi dei ban im da ka jingim laitluid na ka pop ka sang bad ngi dei ban tyrwa ïalade ha Blei Trai Kynrad ban im da ka jingim tipbriew tip Blei bad ban im kum ki khun jong ka jingshai bad ban kiar na ka jingim jong ka jingdum,” la ïai ban u Archbishop bad bynrap, “ka Ïukharist Bakhuid ka dei kaba ngin pynbna.”
“Ka Balang kaba im ha ka Ïukharist Bakhuid ka dei ka Balang Mishoneri. Ïa ngi baroh la khot ban long ki mishoneri khamtam ba ka jingïoh pdiang ïa u Jisu ha ka Ïukharist Bakhuid kan pynlong ïa ngi ki mishoneri,” u la ong.
“Ka Ïukharist Bakhuid ka dei ka jingmaïa kaba ngi dei ban pynbna sha ka pyrthei,” u ong shuh shuh bad bynrap, “lada ngi ieid ïa u Jisu ha ka Ïukharist Bakhuid ngi dei ruh ban ieid ïa ki baduk barangli kumba u Pope Francis u la pynbna ba mynta ka sngi kum u snem ban kynmaw ïa ki Baduk.”