Ryngkat 200 ngut ki khynnah, rakhe ka 6th Battalion Meghalaya Police, Umran ïa ka sngi kyrpang ki khynnah

Nongpoh, Naiwieng 12 : Ban kynmaw burom ïa kata ka sngi kyrpang ki khynnah ba la ju rakhe man la u snem ha ka jylla bad ka ri hi baroh kawei, ka 6th Battalion Meghalaya Police, Umran ha Ri Bhoi ryngkat ka jingïatrei lang ka Meghalaya State Legal Service Authority bad ka Faith Foundation Shillong ha ka sngi Saitjain ki la pynlong da ka jingrakhe kaba kyrpang ïa ka sngi kyrpang ki khynnah (Children’s Day) ha Meghalaya Police Training School and Meghalaya Police Academy kaba don ha Umran ha Ri Bhoi District.
Ha katei ka sngi haduh 200 ngut ki khynnah ki la wan ban shim bynta ban lehkmen leh sngewbha ïa kane ka sngi kyrpang jongki bad la rakhe ruh halor ka phang, ‘ Ba ki khynnah kin wan phai biang sha skul, ka jingshngaiñ ki khynnah bad ka jingïada ba kyrpang” ba la thoh ha ka ktien Nongwei, ‘Back to school – Safety and Security’.
Ban ai mynsiem ban ban pynshlur ïa ki khynnah ha kane ka sngi kyrpang jongki, ki Pulit ka 6th BN MLP bad PTS/MPA Umran ki la phong lang ruh ïa ki uniform skul barim jong ki, ban pynkynmaw ïa ki snem ba la leit noh ba ki dang don hapoh ki skul bad ki la ïa mir jingmut ban ai mynsiem ïa kine ki khynnah.
Kumba la pynpaw, ka jingthmu ba la pynlong bad rakhe ïa kane ka sngi kyrpang ki khynnah, ka long ban ai mynsiem bad pynshlur ïa ki khynnah ba ki dei ban don hapoh ki skul bad kumjuh ruh ba ki dei ban pyndep ïa ki jingpule jongki. Nalorkata, ki khynnah ki dei ruh ban ioh ïa ka jingïada ba kyrpang, ba kin skhem ha ka jingmut jingpyrkhat ba kin nym shah ktah ha baroh ki liang jong ka jingim.
La sdang ban rakhe ïa kane ka sngi kyrpang ki khynnah naduh ka por 9 baje mynstep ba ki khynnah ki la poi ha katei ka jaka ha Umran ha kaba ki khynnah ki la ioh ban ïa lehkmen bad ki pulit lyngba ka jingpyni nam ïa ki rukom treikam jong ki Pulit ban ai ïa ka jingïada ïa ki paidbah, ban ïada na ka jingpluh ding bad la ioh lad ruh ban ai jinghikai shaphang kumno ban ïada na ka jingshah ban beiñ ki khynthei bad ki khynnah bad kiwei kiwei ki bynta ba ki pulit ki trei na ka bynta ki paidbah.
La sam ruh ïa ki khusnam sha ki khynnah ha ki jingïakop bapher bapher bad ryngkat ki prorkam ban pynkmen ïa ki khynnah ba ki kynhun nongrwai ka tnad Pulit ki la rwai da ki jingrwai bad ki jingshad.
Ha kane ka sngi la don lang naduh u Commandant ka 6th Battalion Meghalaya Police, Umran, u Bah Lakador Syiem, ki nongmihkhmat na ka Meghalaya State Legal Service Authority bad kumjuh ruh na ka Faith Shillong ba kynthup ïa ka Kong Andreana F. Khyriem kum ka Counsellor, u Bah Ribansing Nongbsap kum u Community Facilitator.