Jop takma Ksiar u heprit Jason Passah ha ka jingïalehkai Golf, 5 ki takma ksiar khur ka Assam

Shillong, Naiwieng 13 : Ha ka thup ïakhun para parwei, u heprit Jason Passah u la ïoh ban khur ïa ka takma Ksiar na bynta ka Meghalaya ha ka jingïalehkai tied Golf kaba la long ha madan Shillong Golf Course, kaba dei ruh ka madan kaba la ju tip kylleng ka ‘Gleneagles of the East’.
U heprit Jason u la khur ïa ka takma Ksiar ha ka Amateur division bad uba kylla long u nongïalehkai golf ba khynnah tam jong ka jylla. Utei u heprit u dang sdang ïalehkai golf tang ha ki arsnem mynshwa hadien ba u la wanphai ïing noh na ka daw ka khlam Covid-19. Ia ka kyrdan kaba ar ha katei ka thup la ïoh da u Biki Datta jong ka Assam bad u Jonathan Ïawphniaw jong ka Meghalaya.
Katba ki nongïalehkai Golf jong ka Assam ki la ïoh ban tehlakam ïa ka lympung ïalehkai Golf jong ka 2nd North East Olympic Games 2022 hadien ba ki la ïoh ban khur haduh san tylli ki takma ksiar na katei ka lympung.
Katei ka jingïalehkai ka la sdang naduh ka 10 tarik u Naiwieng bad pynkut noh pat hynne ka sngi. Ki nongïalehkai ki ïoh ban ïalehkai haduh 16 tylli ki thliew shisngi ha kine ki saw sngi ha katei ka jaka ïalehkai kaba kham eh hynrei kaba itynnad pat.
Haba phai sha ka jingïalehkai, nalor ki san tylli ki takma Ksiar ka Assam ka la ïoh ruh ban khur ar tylli ki takma Rupa bad ar tylli ki takma Rnong. Katba ka Meghalaya kaba dei ka trai jaka ka kylla long ka jylla kaba ar kaba lah ban ïalehkai bha namar ka ïoh ban khur kawei ka takma Ksiar, hynriew tylli ki takma Rupa bad saw tylli ki takma Rnong.
Ka Manipur ruh ka la ïoh ban khur lang kawei ka takma Ksiar bad ar tylli ki takma Rnong katba ka Arunachal Pradesh pat ka ïoh tang kawei ka takma Ksiar.
Ha katei ka lympung ka Assam ka la ïoh ruh ban khur takma Ksiar na ka jingïalehkai kynhun lyngba ki nongïalehkai kiba kynthup ïa ka Snigdha Goswami, Jakir Hussain, Biki Datta bad Kalyan Sahul. Ka Meghalaya ka la ïoh ban khur ïa ka takma Rupa ha kane ka thup bud sa ka Manipur ha ka takma Rnong.