Hapdeng ka jingiphuh iphieng la plie ïa ka North East Olympic Games

Shillong, Naiwieng 10 : Ka lympung ïalehkai ba hehduh ha ka thaiñ lam mihngi ka ri India, ka North East Olympic Games 2022 la plie pyrda pura ïa ka hynne ka sngi Palei hapdeng ka jingiphuh iphieng ha SAI Sports Centre, NEHU, Shillong. Katei ka lympung ïalehkai kaba sdang ha ka 10 tarik kan kut ha ka 16 tarik Naiwieng hapdeng ki 18 tylli ki jait jingïalehkai ïa kaba yn sa pynlong ha ki jaka bad ki madan bapher bapher.
U Myntri Rangbah haba kren ha kane ka jingïalang u la ong ba ka jingpynlong ïa kane ka lympung kadei shi bynta ka jingrakhe jong ka jylla ïa ka jingdap sanphew snem ka jingïoh la ka jong ka jylla kaba pura. Haba kren shaphang ka jingpynlong ïa kane ka lympung, u Myntri Rangbah u la ong ba ki samla kidei ki rishot ba radbah jong ka ri lada ïalam ïa ki ha ka lynti kaba dei, hynrei lada ym lah ban ïalam ha ka lynti kabym dei kin kylla long ki diengpynkiang ba khraw tam ïa ka ri.
“Ki samla kidei ki rishot ba radbah jong ka ri, hynrei lada ym lah ban ïalam ha ka lynti kaba dei kin kylla long ki dieng pyngkiang kiba khraw tam,” ong u Myntri Rangbah. U la ong ruh ba khnang ki samla kin ïaid ha ki lynti kiba dei ka sorkar ka la thaw bun ki lad ki lynti na bynta jong ki. “Da ka jingkitkhlieh halor kane, ka sorkar ka la thaw ki lad ki lynti ban ïalam ïa ki samla ba kin ïaid ha ka lynti kaba dei da kaba ngi wanrah ïa ka North East Olympic Games. Ngi ai ka kabu ban seng kam lajong, la ka long ka sports polisi bad ka Youth Polisi, khnang ba ki samla kin pynleit jingmut,” la ong u Myntri Rangbah.
Da kaba sngewkhia halor ka jinglong jingman jong ka jingim ki samla ha kiba kum kine ki por, u Myntri Rangbah u la kyntu ba kim dei ban tare sha ki kam kiba sniew khamtam na u drok hynrei ban pynleit jingmut sha ki kam kiban tei ïa ka lawei bad ka imlang ka sahlang.
“Lyngba kane ka rynsan, nga kyntu ïaphi ki samla khamtam jong ka thaiñ lam mihngi ba phi dei ban kiar na ki kam kiba pynthut ïa ka imlang ka sahlang, na u drok bad kiwei kiwei ki jingsniew hynrei phi dei ban pynleit jingmut ha ki kam kiban tei bad kiba ai jingmyntoi ïa ka jingim jong phi lyngba kum kine ki jingïalehkai bad khnang ba kan wanrah ruh ka jingshongsuk shongsaiñ ïa ka imlang ka sahlang hi baroh kawei,” u la ong.
U Myntri Rangbah u la pdiang sngewbha ruh ïa baroh ki nongïalehkai kiba wan ban ïashim bynta bad kyntu ba kin ïalehkai bha bad ban pynleit jingmut bha khnang ba kin lah ban khur ïa ka nam jop. “Nga ngeit skhem ba shisien ka sngi phin sa ïoh ban ïalehkai ha ka Olympic bad nga ngeit skhem ruh ba ba kiba haïing hasem jong phi kin sa sngew sarong na bynta jong phi,” ong u Conrad.
U Myntri Rangbah u la kyrpad ruh ïa baroh ba kim dei ban ïathew lada ki lap kino kino ki jingduna ha ka jingpynlong ïa kane ka lympung. “Nga kyrpad rit ba lada phi lap ki jingduna sngewbha ban map, ngi la pyrshang ban pynbit pynbiang ban pynïaid beit pynïaid ryntih bad nga ngeit skhem ba phin pdiang ïa kane,” la ong u Myntri Rangbah.
U Bah Banteidor Lyngdoh haba ai jingkren u la ïathuh ba ka sorkar jylla ka la ïoh ban pynlong ïa ka Meghalaya Games, bad mynta ka kynti ka la ïoh ban pynlong ïa kane ka lympung ïalehkai kaba heh tam da ka thong ban ïarap kyntiew ïa ki nongïalehkai ka jylla. U la ong ruh ba ïa ka jinglong jong ki samla lah ban ithuh lyngba ki jingïalehkai.
“Ki jingïalehkai kidei shi bynta jong ka jingim ki samla bad ym tang ban ïalehkai hynrei ka pynwan dur ruh ïa ka jinglong ba ki don bad dei ruh lyngba ki jingïalehkai lah ban ithuh ïa ka jinglong ba ki don,” ong u Bah Banteidor Lyngoh.
U la ong ruh ba ka sorkar ka la shim bun ki lad ki lynti ban ïarap ba ki samla ïalehkai kin kiew shakhmat shaphrang ha ki jingïalehkai da kaba ai ki song jingïarap ïa kiba khur takma la ka long ha ki jingïalehkai hapoh ka jylla, ki national bad haduh ki international. U la pyntip ruh ba ka sorkar mynta ka dang don hapdeng ka jingtei ïa ki stadium ïalehkai, ka jingpynbha ïa ki madan kiba don lypa da ka thong ban wanrah ka jingkylla ha ka liang ki kam ïalehkai hapoh ka jylla.
Ha kane ka sngi la ïoh ruh ban thang ïa ka sharak jong ka North East Olympic Games 2022. Ha ka jingplie pyrda ïa katei ka lympung la donlang naduh u Myntri Rangbah ka Jylla u Conrad K Sangma kum u Kongsan, Bah Prestone Tynsong Symbud Mynri Rangbah, Bah Banteidor Lyngdoh Myntri ki kam ïalehkai, u TH Radhesyam Singh uba dei u President ka NEOA, Bah DP Wahlang, IAS Chief Secretary ka Jylla, ki Myntri jong ki tnad ïalehkai jong ki phra tylli ki Jylla ba ïashim bynta, ki ophisar, ki nongkitkam ka MSOA, ki nongkitkam jong ki State Assocoation, ki kynrem ki lyndan, ki nongïalehkai bad ki paidbah.