Shillong, Naiwieng 10 : U Myntri Rangbah ka jylla u Conrad K Sangma u la ong ba ka sorkar kan ym ktah satia ïa ka Reservation Policy bad kan ïeh beit kumba ka long ne kan pynneh beit ïa ka Status Quo.
ïa kane ula ong ha ki nongthoh khubor ha ka jingïakynduh ha ka Sngi Balang hadien ba la wai ka jingïalang ka Kynhun Myntri.
“ Ngi la dep kren shai ba ngin y m ktah ïa ka Reservation Policy namar ka long ka mat kaba hap ban da bishar bniah bha bad kumta ngin pynneh beit ïa ka Status Quo kata pynneh beit kumba ka long mynta” ong u Myntri Rangbah.
U la kren shai halor kane hadien ba la kylli kumno ka sorkar kan leh halor ka jingdawa ki seng bhalang ban pynkylla ne bishar bniah biang ïa ka Reservation Policy ne ka polisi bhah kam bhah jam ha ka jylla namar la kynnoh ba ka la ai jingmyntoi tang ïa kawei ka jaidbynriew riewlum ha ka jylla.
Halor ka jingpynmih hukum ba dang shen jongka ïing bishar Supreme Court halor ka Reservation Policy ba ïa kane ka polisi ym dei ban pynneh slem, u myntri rangbah u la ong ba wat la katta ruh yn ym ktah ïa kane ka polisi bhah kam bhah jam ha ka jylla.
“ Nga tharai ka ïing bishar Supreme Court ka ai ka hukum halor ki jingïohi bad jinglap jongka ba lehse lada pynneh slem kan ktah namar ha kane ka juk ïabeh mynta lada dei ki rit paid ne ki heh paid ruh la ïabeh beit ïaka jingnang jingstad bad ka ïoh ka kot. Kumta baroh ki jaidbynriew ki la ïalong mar kumjuh hi kumba la ïohi da ka ïing bishar Supreme Court, kumta ngam kwah ba kynthoh halor kane ka hukum ba la pynmih da ka ïing bishar ba hakhlieh duh” ong u Myntri Rangbah.
