Shillong, Naiwieng 9 : U Myntri Rangbahka jylla u Conrad K Sangma mynta ka Sngi Balang ula ong ba ka sorkar kan sa bishar bniah halor ka hukum jongka Election Commission jongka India (ECI) na ka bynta ban pynkynriah kam ïa ki ophisar shwa ban long ka election MLA 2023.
“ Kat kum ka jingbthah ba la ai da ka ECI ka sorkar kan sa leh ïa kaba donkam namar ka ju long ka rukom ba man la ki election hap ban pynkynriah kam beit ïa ki ophisar kiba dei peit bad pynïaid khamtam ïa ka election khnang ba kan ym don kano kano ka jingleh shilliang khmat” ong u Myntri Rangbah.
U la ong “ Kane ka dei kaba ju jia bad hap leh hi man la ka election kam dei kaba ju jia kyndit kyndit namar man la ka election hap ban pynkynriah kam beit ïa ki ophisar khamtam lei lei kito kiba la don palat ïa ka 3 snem ha kajuh ka jaka hap ban pynkynriah noh ïaki shawei pat.Kane ka dei kaba ka ECI ka la ju bthah hi man la ka election “ ong u Conrad.
Haba la kylli hato ka sorkar ka kwah ban pynlong ïa ka election shwa ban kut ka samoi, u Myntri Rangbah ula ong kam don kaei kaei ruh kaba kum kata ba kwah ban pynlong ïa ka election shwa ban kut ka samoi.
U la ong “ Ha ka jinshisha ka election kane ka la hajan hi lada phim kwah shuh ban ïalehkmen Khristmas. Hynrei namar ka Khristmas ngi dang sngew jngai ïa ka. Kane ka dei kaba la ju leh hi ban pynkynriah kam bad ka sorkar ka hap hi ban bud ïa kaei kaba la bthah da ka ECI” ong biang u Myntri Rangbah.
Kat kum ka shithi ba la phah da u Principal Secretary ka ECI u Narendra N Butolia ha ka 4 tarik Naiwieng la ong “ Ka Commission ka bthah ïa baroh ki jylla bad ki Union Territory ki ban leit sha ka election ha u 2023 ba ki dei ban pyndep ïa ka jingpynkynriah kam shwa ka 15 tarik Nohprah. ïa kane ka hukum la phah sha baroh ki jylla bad ki union territory ki ban long election kata sha u Chief Secretary bad sha u DGP ka jylla. ïa ka kaiphod ba la dep ban pynkynriah kam dei ban pynpoi sha ka ECI shwa ka 15 tarik u Nohprah.
