Shillong, Naiwieng : U MLA ka Mawlai u bah PT Sawkmie ha ka 05 tarik u Naiwieng, 2022 (Sngi Saitjaiñ) u la aiti ïa ka kali lur lyngkha (Power Tiller) sha ka seng ki nongrep ka Hills Farmer Union, Mawlai Circle ha ka prokram kaba la pynlong ha shnong Mawsiatkhnam.
Nalor ka kali lur lyngkha u MLA u la ai ruh ïa ki jaiñ kup syaid sha ki longkmie ka thaiñ kiba donkam ïa kum kine ki jaiñ kup.
Ha kane ka prokram la ia don lang u president ka HFU, Mawlai Circle, bah C Kharumlong, ki nongkit kam HFU, u rangbah shnong Mawsiatkhnam bah Shemphang Wahlang, ki nongkitkam shnong, ki heh UDP na Mawlai, ki longkmie bad kiwei kiwei.
Haba ai jingkren u Bah PT Sawkmie u la kubur kumba ong kiwei ki nongkren ba hashuwa, ba tang kawei ka power tiller kam pat biang bad ki donkam shuh ïa ka, kumta u la pynpaw ba kam don jingeh. Ym tang ïa ka Power Tiller hynrei wat ki symbai bad kiwei ki jingdon ruh ban pynbiang ïa ki.
U Bah PT Sawkmie u la pynpaw ruh ïa ka jingsngewkhia ha kaba ïadei bad ka jingshah ot kilo ïa ki marrep haba leit die ïa ki sha ïewduh bad u la ong, lada wan Myntri Rangbah da u jong la jong na ka UDP ha u 2023 un kyntu ïa u Myntri Rangbah ban pynmih hukum ban phah sangeh bad phah kem ïa kito kiba ot kilo ia ki mar rep ba ju leit die sha Iewduh.
Ha kane ka sngi la ïoh ruh ia ka jingkren na u general secretary ka UDP Mairang u bah Tyros Warjri uba la ther tyngeh ïa ka NPP hapoh ka jingialam jong u Conrad Sangma ba ki tuh ki thiem im im peit peit na la ka jong ka jylla ban pynkhlaiñ ïa la ka parti bad ban leit theh pat sha kiwei ki jylla.
U la ong ruh ba ki paidbah na baroh ki thaiñ ki ïohi ïa ki kam u MLA Mawlai, kumta u la buh jingkylli kumno keiñ ki nong Mawlai kin pynrem ia kum une u MLA uba trei bad ïarap ïa ki paidbah, khamtam ha ka por covid ba khangdam.
Ha kane ka sngi la ïoh ruh ïa ka jingkren na u bah Teibok Kharkongor, secretary ka UDP Mawlai Circle, na u Bah Wanseng Jyrwa, Working President ka UDP Mawlai, na u rangbah shnong Mawsiatkhnam, na u nongai buit ka HFU Mawlai u bah KW Lynrah bad kiwei kiwei.
