Na 5 ngut ki MLA ka Ri-Bhoi, tang u Bah George bad Bah Mayral kiba don ka sur Nongïalam : samla Albert

Nongpoh, Naiwieng 07 : U Samla Albert Maring naka shnong Pahamdumu ha Ri-Bhoi u la mih shakhmat ban pynpaw ïala ka jingsngew bad ka jingiohi ïaka jinglong bad ka jingtrei ki nongïalam ha Ri-Bhoi ha kaba u la pynpaw ba napdeng 5 ngut ki nongmihkhmat (MLA) ha Ri-Bhoi, dei tang u Bah Mayral Born Syiem MLA ka Nongpoh bad u Bah George B Lyngdoh MLA ka Umroi, kiba dei shisha ki nongïalam kiba tbit, ki don shisha ka sur ban kren ban ïasaid naka bynta ki paidbah jong ka them Ri-Bhoi.
U la pynpaw ruh ba kine ar ngut ki rangbah ki la dei shisha ki nongïalam ki ba shem phang kiba iohi jngai bad kiba nud ban kren halor ki mat ki ishu bapher bapher na ka bynta ki paidbah ka them Ri Bhoi bad ka jylla hi baroh kawei, wat la ki dang jop elekshon ha ka sien kaba nyngkong hynrei ki la pyni bad sei ïa ki sap nongïalam jong ki .
Kine ar ngut ki rangbah nongmih khmat na Ri Bhoi kila dei ki nongïalam kiba don ka sap nongïalam kiba nud ban kren ban ïa said ha iing Dorbar thawaiñ ka jylla, ki bym ju salia bad ki bym ju kynran dien ban kren ïaka jingshisha, bad haba phai ïaka jinglong nongïalam jong ki, kim dei shuh ki nongïalam tang haki constituency ba ki mihkhmat hynrei ïaka dong Ri Bhoi bad ka jylla baroh kawei, bad ka Ri Bhoi ka don kam shibun ki nongïalam kum kine ki Rangbah ban long ki sim pah sim song, ki rang kynih ki rang phawer ki ban ïa said ïa thir ha iing dorbar thawaiñ naka bynta ka sur u paidbah la pynpaw utei u rangbah.
Shuh shuh ki paidbah ki donkam ban jied bad ai lad biang ia kine ki rangbah khnang ba kin lah ban nang kham pyn janai ïa ka sap jinglong nongialam nongmih khmat jong ki ba kin lah ban ai ka jingshakri kaba kham bha na ka bynta ki paidbah, namar kine ki rangbah ki dei kiba don ka sap ban shakri ïa ki paidbah kiba don ka bor bad kiba bit wat ban ïalam ïa ka jylla ban long myntri rangbah jong ka sorkar jylla ruh . Kumta ki paidbah ki dei ban jied ïa ki ban pynjop biang ha ka election 2023 na ka bynta ka burom jong ka Ri Bhoi bad ka jylla hi baroh ka wei.
Ban long ki nongmih khmat paidbah kiba don ka sap ban shakri ïa ki paidbah kiba don ka sur ban kren ban ïasaid ki nong thaw aiñ ka jylla , kam pher wat la ki don ha kano kano ka political party ki nongïalam kiba stad bad kiba tbit ka don la ka jong ka dor.
U Samla Albert Maring u la pynpaw ruh ba um don kano kano ka jingïadei kyrpang haka politik bad kitei ki nongmihkhmat hynrei ka dei ka jingiohi ba kidei ki nongïalam kiba shait mih shakhmat naka bynta ki paidbah.