Buh thong ka sorkar jylla ban pynmih ki nongïalehkai ban ïashim bynta ha ka Olympic Games 2023

Shillong, Naiwieng 02 : Ka sorkar Meghalaya ka la buh ka thong ban pynmih ïa ki nongïalehkai kiban mihkhmat ïa ka jylla sha ka Olympic Games 2032 bad ka la sdang da kawei pat ka sienjam ban pynurlong shisha ïa katei ka jingangnud.
Kane kadei ruh shi bynta ka khubor ba la kren da u Myntri Rangbah ka jylla u Conrad K Sangma lyngba ka video uba la ai jingkren halor ka 2nd North East Olympic Games 2022, ba ka Meghalaya kan pdiang ban pynlong mynta hi u bnai Naiwieng.
“Kane kadei ka jingïalehkai kaba heh tam ba ka Meghalaya kan ïoh ban pynong bad ka jingpynlong ïa katei ka lympung kan dei ruh shi bynta ka jingrakhe dap 50 snem jong ka jingïoh ïa la ka jong ka jylla ba pura,” ong u Conrad K Sangma da kaba pdiang sngewbha ïa ki 2,000 ngut ki nongïalehkai kiban sa mih na la ki jong ki jylla ban wan hangne ha Meghalaya.
U Myntri Rangbah uba dei ruh u Chief Patron na bynta katei ka jingïalehkai u la pynpaw ruh ba ka jylla ka la ai ka jingïarap na bynta ki nongïalehkai kiba ïoh ka jingjop, da kaba pynkup burom ban nang pynshlur ïa ki ba kin nang ïoh shuh shuh ki khusnam nam jop, ha kaba kiba khur ïa ka takma ksiar kin ïoh da ki phew phew hajar ha ki jingïalehkai hapoh ka jylla bad 75 lak ïa kiba khur takma ha ka Olympic.
“Ha kine ki saw snem ba lah dep, ka sorkar Meghalaya ka la pynkylla ka rukom treikam na bynta ki kam ïalehkai ha ka rukom kaba janai, kata da kaba ngi ithuh ïa ki nongïalehkai kiba don sap, da kaba kyntiew ïa ka mang tyngka na bynta ban shna ïa ki jaka ïalehkai, ka jingïarap kyrshan pisa na bynta ki synjuk pynïaid ïalehkai ba kin ïoh ban pynlong ïa kiba bun ki tournament bad phah ïa ki nongïalehkai ban mihkhmat ïa ka jylla sha ki jingïalehkai kiba dei shabar,” u la ong.
Watla ka Meghalaya ka angnud ban pynmih nongïalehkai ban ïashim bynta ha ka Olympic, na ka liang u Myntri Rangbah u la bynrap, “Ka long kaba donkam ba baroh kiba don bynta ha ka sport kidei ban trei shitom bad ka sorkar Meghalaya ka don ka bynta ban pynkup burom ïa baroh ki nongïalehkai ban ai mynsiem bad ban ithuh ïa ka jingtrei shitom jong ki ban poi sha ka thong jong ka jingjop.”
Ka jingpynkhreh ban pdiang pynlong ïa ka 2nd North East Olympic Games 2022, ka dang ïaid shaphrang ha kaba kin don 18 tylli ki jait jingïalehkai ha katei ka lympung kaban sa sdang naduh ka 10 tarik Naiwieng.
Ha ka sngi Balang, u Dr Vijay Kumar D IAS, uba dei u Co-Chairman ka NEOG 2022 bad Commissioner bad Secretary jong ka sorkar jylla, u la hiar ban jurip ïa ki jaka ïalehkai ha ryngkat ka jingsynran lang u Secretary jong ka sorkar jylla u Bah Cyril VD Diengdoh IAS, u Director of Sports and Youth Affairs, u Shivansh Awasthi IAS, nalor kiwei kiwei ki ophisar.
Katto katne ki madan ïalehkai la shna pynheh shuh shuh kum ka madan MFA Turf, Third Ground, ha kaba ïa ki floodlight bad ki stand la rah sha katei ka jaka ban kaban sa pynlong ïa ka jingïalehkai phutbol.
Kum shi bynta ruh ban pynïaid beit pynïaid ryntih ïa katei ka lympung ïalehkai, na ka liang ka tnad pynïaid ïalehkai ka la thung da ki spah ngut ki volunteer.