Shillong, Naiwieng 02 : Ka lympung ïalehkai phutbol ha ka 2nd North East Olympic Games 2022 kaban sa long shen hapoh ka jylla kan sdang ha ka 7 tarik Naiwieng ha kaba yn sa sakhi ïa nongïalehkai kynsai ba kynthup ïa ki shynrang bad kynthei jong ka thaiñ North East.
Watla ka North East Games 2022 yn sa plie pyrda ha ka 10 tarik Naiwieng, hynrei ka jingïalehkai phutbol kan sdang ha ka 7 tarik Naiwieng, pynbna ka Kong Philarima Hynñiewta kaba dei ka manager.
Mynta ka kynti la pynkylla ïa ki jaka pynïalehkai, ha madan MFA Turf, Third Ground, Polo. Ki hynriew tylli ki floodlight jong ka SSA Stadium jong ka First Ground la pynkynriah sha MFA Turf, ha kaba yn sa pynlong bun ki jingïalehkai na ka daw ka jing dum kloi jong ka Tlang. Na bynta ka jingmyntoi ki player, ïa ki kamra khreh la dep ban pynbit pynbiang lyngba ka jingïarap ka sorkar jylla, kaba thrang ban pynlong ïa katei ka lympung kaba ïaid beit ïaid ryntih bad kaba jop.
Ha ka phutbol jong ka NEOG 2022, ka kynthup ïa ka kyrdan U-21 ki shynrang bad U-17 ki kynthei.
Ha ka liang ki shynrang, ka Manipur, Mizoram, Tripura bad Assam ki don ha ka Group 1 bad ka Meghalaya, Nagaland, Arunachal Pradesh bad Sikkim ki don ha ka Group 2.
Ka Meghalaya ka don ruh ha ka Group 2 ha ka liang ki kynthei, ha ryngkat ka Mizoram, Arunachal Pradesh bad Sikkim. Ha ka Group 1 ka kynthup ïa ka Manipur, Assam, Tripura bad Nagaland.
Na ka liang u Bah Khlaiñ Pyrkhat Syiemlieh coach jong ka kynhun ki shynrang, u la khmih lynti ba baroh ki kynhun ki long kiba khlaiñ khmtam ki nongïalehkai ka Mizoram bad Manipur.
“Ïa ka Nagaland ruh ym lah ban kheiñ sting namar kadei ka kynhun U-17 (boys) kaba la jop nam lahduh ïa ka Subroto Cup (ha u Risaw) bad napdeng kitei ki player kin don ha ka kynhun U-21,” ong u Bah Khlaiñ Pyrkhat.
Ka kynhun ïalehkai jong ka jylla Meghalaya baroh ar tylli ki kynhun ki la kilan met bha ha madan MFA ban pynkhreh na bynta katei ka lympung, bad ki da khmih lynti ba kin ïoh ki jingkyrshan ba pura na ki paidbah ka jylla khnang ba kin lah ban ïalehkai kham bha shuh shuh ban ïa ka jingïalehkai kaba nyngkong ha ka NEOG kaba la long ha Manipur ha u 2018.
Saw snem mynshwa ka Meghalaya ka la jop takma rnong ha ka liang ki shynrang bad ka la duh khur takma noh ha ka liang ki kynthei kaba la wan ha ka kyrdan ba saw
“Ka Meghalaya da shisha ka ka ïoh ka kabu kaba biang bha mynta ka kynti hynrei ki don napdeng ki katto katne ki player kiba don hapdeng ka jingmynsaw, bad ngin hap ban peit shwa halor kane. Kyrmen skhem ba kin ïoh noh ki met ba koit ba khiah,” la ong u Bah Khlaiñ Pyrkhat Syiemlieh.
