Shillong, Naiwieng 01: Ha ka jingïalang ka barit hynrei kaba ishongkun, ka Kur Sten ryngkat bad ki khun ki ksiew jong u Prof. H.W.Sten ki kynmaw burom ïa ki jingtrei bad ki kam jong utei u riewkhraw ka jaidbynriew mynta ka sngi ha ïingsah jong u ha Kench’s Trace Shillong. Katei ka jingkynmaw ka hap ruh bad ka sngikha ba 84 snem jong u, bad ka lyngkhuh ba 25 snem naduh ba u la khlad na kane ka pyrthei ha ka 7 th September 1997.
Ha ka jingkren kum uwei na ki dkhot jong ka Kur Sten, u Bah HT Wells u la pynkynmaw ïa ki kam ba radbah jong utei u riewkhraw ym tang u jong ka Kur hynrei u jong ka jaidbynriew Khasi-Pnar. U bah Wells u la ong, ba u Prof. Sten u la wan na ka longïing baduk ba raitong,u la sdang ïa ka jingim kum u khynnah sharai masi da kaba leit skul-miet bad thohdak da u rnga bad riewhadem, hynrei u minot thop ha kti ha kjat jong ki masi ryngkat bad ka kot kyndong ha ka kti. Kham hadien, u la trei kum u Chowkidar jong ka Barato Dispensary West Jaintia Hills District, nangta u la leit pule sha Mynso bad pyndep Middle English bad na Basic School Jowai.U la sdang ban kyrshan hi dalade ïalade da kaba leit bylla bad ïarap ruh ïa u Bah Edwinson Bareh MLA & MDC kum u barikor ban dro ïa ki poster election sha ka United Khasi Jaintia Hills Autonomous District Council ha kaba ka symbol jong utei u rangbah ka dei da u Khnam bad ka Ryntieh. Nangta haba u la trei ha District Council, u la ïohlad ban pyndep ïa ki jingpule sha ki kyrdan ba kham heh naduh ka Intermediate of Arts, katba u dangtrei ruh kum u Stenographer ha Governor’s secretariat bad u la lah ban pyndep ruh ïa ka B.A, M.A (English) ter ter haduh bad Ph.D. halor ka Thesis “The Khasi Poetry : Its Origin and Development”. Nangta, u dei ruh uwei na ki nongseng ïa ka kot khubor phareng ba nyngkong jong ki trai ri ba la tip kum ka Implanter.
U Bah HT Wells u la ong,namar ki jingtrei shitom ba minot thop jong u, ka pynshisha ba ka jingduk bad jingsahdien kim lah satia ban khanglad ïa u ba un ïaid shaphrang. Ka long kaba shisha,wat la ym shym la kha ïa u kum uwei na ki riewkhraw pynban u la pynlong khraw ïalade da kaba tyngshaiñ kum uwei na kikhlur ka Ri. Ha ki khyndiat snem ka jingim jong u, u prof. HW Sten u la lah ban thoh shibun ki kot kum u Khrist u pdiang ïa ki nongpop, Ka Miet badum kan jah, Ki sur na ka Duitara ksiar, ka Mahadei, Burom ba la jah, Ka Grammer ha ka ktien Khasi, ka History ka Ktien Khasi, Ka jingkwah bymjukut (Everlasting Desire) bad kiwei. U Bah Wells u la ïathuh ba ka Kur Sten ryngkat bad jingmynjur jong ki Khun bad I Para Khatduh jong u Prof.Sten kum ka jingpynsahnam ïa u, ki la lah ban sdang ïa kawei ka Award ba la tip kum ka Prof. H.W. Sten Excellence Award sha ki 4 ngut ki toppers jong ka Kur Sten, ïa kaba la sdang naduh ka 6.4.2011 haduh mynta,don napdeng jong ki kiba la pyndep ïa ka Ph.D ha ki line bapher bapher. La pynkynmaw ruh ba u Prof. HW Sten u dei u founding President jong ka seng Latympang Welfare Organisation (LWO) ban peit ïa ka ha ka miat jong ka thaiñ Barato-Shiliang Myntang Elaka.
Na ka liang ka ïing, I Kong Salemfort Khonglah, I kurim jong u Prof. Sten i la ai sngewbha Rs. 1 Lakh tyngka sha u President jong ka Kur Sten na ka bynta ban nang pynheh shuh shuh ïa katei ka Award ha ka kyrteng jong u Kpa ka ïing. La ïoh ruh ban pynlait biang ïa ka Kot “ Everlasting Desire” da u Bah Majesty Sten uwei na ki Pyrsa trai jong u bad da ka jingtrei shitom jong ki laingut ki khunsiew jong u, u Reuben, Dichen Heimon bad Nambhah Dimi. Ïa katei ka kot kaba la pynkylla ruh sha ktien Khasi “Ka Jingkwah Bymjukut”
Hashwa ïa kata, la ïoh jingkren ruh na u Bah Gilbert Sten President Kur Sten Dorbar Pyllun,Meghalaya ha kaba utei u rangbah u la ñiewtang ïa ka jingïohi-jngai jong utei u riewkhraw kumno ban pynlum pynlang ïa ki dkhot jong ka Kur ka jaid, na Bhoi, na Shillong bad na Jaiñtia bad nawei pat.U Bah Gilbert u ong ba u Prof. Sten u dei u briew u bym sngewbha ba ki khun, ki hymmen ki para bad ki pyrsa jong u ba kin thiah- thai bad jaipdeh, u kyntu borabor ïa ki ba ki dei ban ïabeh ban pyndep ïa ki kyrdan pule, namar dei tang ka jingstad kaba kiwei kim lah ban tuh lane ban ibeiñ.
La ïoh jingkren ruh na i Dr Sunita Khongwir HoD English Shillong Commerce College iba la kdew ïa ki pasoh ba do ha katei ka kot.
Kum I nongpynïaid ïa ka jingïalang, I Dr. Shiboleth Khonglah iwei na ki khun jong u Prof.Sten, I la pynkynmaw ïa ka jingtrei shitom jong u Kpa da kaba khie treikam kum u ngaptem naduh 4 baje mynstep man ka sngi kat ban da khie ka pyrthei, I la dep ban thoh katto katne tylli ki article lane ki lynnong kot. I la ong ba u kpa jong i, u la pynlut shibun ïa ka jingkynshew jong u na ka bynta ban shon kot ban kyntiew ïa ka thup jong ka Thoh ka Tar jong ka Jaidbynriew.U dei u briew uba trei shitom bad uba raikut ba ka Jingduk kam dei ban ban khanglad ïa ka jingïaid shaphrang. U dei uwei na ki laingut kiba la seng ïa ka Khasi Department ha ka skulbah NEHU.
La ïoh ïa ka jingkren pdiang sngewbha da ka khun nyngkong jong u, I kong Tranquillity Khonglah bad la ai jingkren khublei da u bah Heimon Nongpluh (Retd) IPS, Chief Information Commissioner Meghalaya uba long u pyrsa kurim jong u Prof. Sten.
