Ha kane ka ri synshar paidbah ba ieit jong ngi, ngi do ka Riti Synshar kaba la kdew shai kdar ba ki paidbah ki don ka hok ban ïakhih halor kino kino ki mat kiba kim sngew ïahap ne ki kwah ban wanrah ka jingpynkylla tangba ki jingïakhih kim dei ban long da kaba ïa umsnam hynrei da kaba jai jai. Ha kane ka juk ba mynta lei lei ym dei shuh ban iakhih da ki maw ki dieng namar ka dei ka juk stad bad ka juk jong ki bor technology kumta donkam ban ïakhih da ka jingproh jabieng.
ïa ka ri India la ïakhih ban ïoh ïaka jinglaitluid na jingsynshar ki dohlieh hapoh ka jingïalam u kpa ka jaidbynriew u Mahatma Gandhi da ka lynti ba jai jai bad mynta la ïoh 75 tylli ki snem ba ka ri India ka la laitluid. ïa ka jylla Meghalaya la ïakhih ban ïoh ïa ka jylla ba pura da ka lynti ba jai jai khlem ka jingïaumsnam bad mynta ka la dap 50 tylli ki snem. Kumta lada dei kino kino ki jingïakhih ruh kham kloi bad suk ban ïoh da ka lynti ba jai jai ym da ka jingïaumsnam ne ban bom ban tied ïa ki briew naphang khlem jingpyrkhat shuh.
Dang shen ka FKJGP ka la lam khmat ban ïaid paidbah halor ka jingkyrduh kam kyrduh jam jong ki samla. Kane ka mat ba ka Seng ka shim ka long kaba dei bad kaba la ai ka jingkyrshan lehse da baroh ki long ïing longsem namar ha man pa kawei pa kawei ka thliew ïing kin don beit ki khun samla kiba ladep pyntbit ki jingpule hynrei kiba hap ban shong thiah thai ha ïing namar ka jing bym ïoh kam ïoh jam. Hynrei kaei kaba la pyndiaw bad pynsngewsih bad pynrem pat da baroh ka long ba ki don ki riew shim kabu kiba hapdeng ka jingïaïaid paidbah ki la bom la tied naphang ïa ki briew. Haba ïakhih halor ki mat kam mut ba kiwei ki jaitbynriew kin long ki sohpdung hynrei kaba lyngngoh ka long ba haman la ki mat jingïakhih ba ki seng bhalang ki shim kaba kut ka kylla beit sha ka jingïashoh ïadat, ïa pyniap, ïa thang ïing bad ter ter ïa kiwei ki jaidbynriew. Ym dei ba ïashah ïakiwei ki jaidbynriew hynrei kynmaw ba baroh ki nong India ki don ka hok ban im ban sah ha kano kano ka jaka ne jylla hapoh u pud u sam ka ri India kaba long kat kum ka Riti Synshar jongka ri.
Dei na kata ka daw ba ki khun samla jongka Bri U Hynniewtrep ruh da ki spah da ki hajar ngut ki leit ban pule bad treikam shabar ka Meghalaya. Phi sakhi hi katno hajar ngut kiba treikam sha kiwei ki jylla na ka khlam COVID haba ki la hap ban wan phai noh sha ka jylla Meghalaya. Kynmaw ba kane ka jingleh jong ki khyndiat ngut bunsien ka pynjah burom ïa ka jaidbynriew bad ka jylla hi. Nalor kata ka buh sa ïa ka jingim jong kiwei ki khun samla kiba pule bad trei shabar ka Meghalaya ha ka jingma jong ka jingim. Namar ha kane ka juk social media tang shu jia kano kano shiphang la saphriang lut kylleng ka ri India bad wat kiwei ki ri ka pyrthei ruh.
Kumta kum ki seng bhalang ki dei ban peit bha haba pynlong ïa kino kino ki prokram jingïakhih dei ban da bishar bniah ba ki dkhot kin ym leh kulmar bad dei ban bishar bniah ruh ba ki riew shim kabu ba thap tang ban pynkulmar shnong kin ym ïoh lad ban ïashim bynta ha kino kino ki jingïakhih namar haba jia kino kino ka jingkitkhlieh kan hap leit sha ki nongïalam kito ki seng kiba khot pynlong ïa ki prokram jingïakhih.
Sa kawei ruh ha kane ka juk mynta ban shu shaniah than ha ki kam sorkar ruh kam long kaba dei namar ym lah ban thung kam ïa baroh, hynrei ki khun samla ki dei ruh ban trei shitom na lade ruh da kaba shim ïa ki skhim bapher bapher ba la ai da ka sorkar bad seng ïaka nongrim ban ïeng ha la ki kjat bad aikam ai jam sa ïa kiwei ruh namar dei tang kane kaba lah ban rat dyngkong ïaka jingkyrduh kam kyrduh jam ym dei ki kam sorkar.
