Shillong, Risaw, 31: Ïa ka ophis trei kam jong ka seng ka All Meghalaya Contractors bad Suppliers Association (AMCSA) la plie ha phyllaw jong ka PWD ha Barik, Shillong na ka bynta ban peit ïa ka bha ka ka miat jong ki kontrator kane ka jylla Meghalaya.
Ïa ka ophis ka seng la plie da u President u Bah B.L Nongbri, ryngkat ka jingsakhi lang jong u Bah Emanuel Syiem Malngiang u General Secretary, u Bah Precious Sumer Vice- President bad baroh ki Executive Member kila ïa don lang.
Ha kane ka jingplie ïa ka ka ophis ka AMCSA la sakhi lang ruh da u E.E PWD (R) Shillong Central Division u bah C. Kharmudai, E.E PWD Electrical Shillong Electrical Division Bah Phrangky Dhar, S.E PWD Building Bah Dawhoi Langstang.
Ha kane ka sngi la don lang u Bah Dundee Khongsit President ka FKJGP, u Bah Gilbert Laloo President barim bad kiwei kiwei de kiba la shah khot sngewbha na ka tnad shna surok jong ka jylla kiba la ïa don lang.
La plie ïa kane ka ophis treikam ban pynsuk ïa ka rukom treikam bad kumjuh ruh ban lah ban ïarap ïa ki para kontraktor haba shem ïa kano kano ka jingeh.
Kane ka ophis treikam kan long ruh ka shlem ïamir jingmut bad kan long ruh ka jaka ban ïaphylliew jingmut hapdeng jong ki, ong u kyrwoh ba la phah da u General Secretary ka AMCSA u Bah Emanuel Syiem Malngiang.
