Shillong, Risaw : Khatduh ka shnong Mawlai Phudmuri, hadien shi snem shi bnai thik ka la ïoh ïa u rangbah shnong thymmai ba la jied ïa u bah S. Khongkliam ha ka dorbar kaba la pynlong ha madan heh mini stadium, Phudmuri hynne ka sngi.
Kane ka jingjied ka la long ruh shi bynta jong ka jingkyntiew kyrdan ïa u bah Khongkliam uba bat baroh shikatta kum u acting rangbah shnong bad ïa ka kam Secretary ki paidbah ki la jied ïa u juh uba ju bat baroh shikatta, kata u bah Lamphrang Nengnong.
Ha kane ka sngi ka dorbar shnong Mawlai Phudmuri ka la pynkup burom ruh ïa ki arngut ki nongshong shnong kiba ju noh synñiang sha ka shnong, kata ïa ka kong Nancy Sohtuh, kaba dei ka ASHA bad ïa u bah Hoke Kharumnuid ba ju khot ieit Padit ba u ju pynïaid kali ha Mawlai Stand bus.
Nalor kata ha kane ka dorbar la pynkup burom ruh ïa ka kong Nancy halor ka jingtrei shitom jong ka kaba la ïoh ruh ïa ka jingithuh na ki bor pynïaid district jong ka East Khasi Hills ha kaba ki la ai khusnam ïa ka ha ka sngi rakhe ïa ka Republic Day ha madan Polo.
Katba u Padit pat halor ka jingnoh synñiang jong u ïa ka shnong haba pynïaid ïa ki kali ha Mawlai stand bus kaba ju mad khah khah ïa ka jingdheng kali.
Kumba shu kdew ka DS Mawlai Phudmuri ka la jied ïa u rangbah shnong hadien ba ka jingkhlad noh jong u rangbah shnong barim u bah Silvester Kurbah ka la kynjoh sha ka shi snem shi bnai thik, kata hadien ba u bah Kurbah u la khlad ha ka 24 tarik u Nailur, 2021.
Ki paidbah nongshong shnong hadien ba la wai ka dorbar ki la pynpaw ka jingkmen ba ki la ïoh ïa ka dorbar kaba ïaid beit ïaid ryntih hapdeng jong u slap bad ka bym shym la don kano kano ka jingpynthud.